«JI-den jaqsyraq»: Prezıdent tulparynyń jańa vıdeosy qyzý talqylanyp jatyr
ASTANA. KAZINFORM – Prezıdenttiń súıikti sáıgúligi Aqjannyń keń dalada jeligen jańa vıdeosy jarııalandy.
Aqjan – óte sırek kezdesetin qylańboz tústi jylqy. Ǵanatly jáne Tabys degen túrikmenniń taza qandy aqaltekesinen týǵan. Mundaı qylańboz túkti jylqy Aqalteke tuqymynyń óz ishinde 3 paıyzǵa jetpeıdi.
Sol sebepti álemde de, áleýmettik jelide de Aqjannyń dańqy keń tarady.
Dala tósindegi vıdeony 2 mıllıonnan astam oqyrmany bar tanymal bloger Dastan Muhametrahym paraqshasynda jarııalady.
– Jasandy ıntellektiden jaqsyraq. Sebebi bul shynaıy, – dep jazylǵan beınekadrda.
Túsirilim jumystary Astana qalasynyń mańynda ótken.
– Tulpardy alǵash bolyp tabıǵatqa shyǵaryp, dronǵa túsirdik. Prezıdentimizdiń senimimen súıikti tulparyn túsirý maǵan buıyrǵan eken, – dep jazdy Dastan Muhametrahym Instagram paraqshasynda.
Osyǵan deıin «Aqjan — Uly dalanyń mádenı fenomeni» degen taqyryppen materıal jarııalaǵan edik.
