JI dáýirinde jumys berýshiniń jaýapkershiligi artady - sarapshy
ASTANA. KAZINFORM - Halyqaralyq KIOSH 2026 konferentsııasynda jasandy ıntellektini qoldaný kezinde jumys berýshiniń jaýapkershiligine erekshe nazar aýdaryldy.
Áleýmettik qorǵaý salasyndaǵy halyqaralyq sarapshy, Vılnıýs ýnıversıteti ǵylymı qyzmetkeri Aýdrıýs Bıtınas eńbek qatynastarynda tsıfrlyq tehnologııalardy qoldanýdyń eýropalyq tásilin tanystyrdy.
Onyń aıtýynsha, jasandy ıntellekt táýekelderdi taldaý men ınspektsııa júrgizýde belsendi qoldanylyp keledi. Alaıda ol adamǵa tán mańyzdy faktorlardy eskere almaıdy.
- Jasandy ıntellekt táýekelderdi anyqtaý jáne tekserister júrgizý úshin qýatty qural bolǵanymen, ol kúızelis, qorqynysh jáne tulǵaaralyq qatynastar sııaqty negizgi adamı faktorlardy eskermeıdi. Tsıfrlandyrý jaǵdaıynda da qyzmetkerlerdiń qaýipsizdigin qamtamasyz etý jaýapkershiligi jumys berýshiniń moınynda qala beredi. Eýropalyq tájirıbe qyzmetkerler quqyqtaryn qorǵaýdyń qatań talaptaryna jáne algorıtmderdiń yqpalyn shekteýge negizdelgen. Bul tek formaldy kelisimmen nemese ótemaqymen shektelýge bolmaıtynyn bildiredi. Jumys berýshi eńbekti qorǵaý men ónerkásiptik qaýipsizdiktiń tıisti deńgeıin qamtamasyz etýge mindetti, - dedi sarapshy.
Ol sondaı-aq Eýropalyq odaqta jasandy ıntellektini retteý máselelerine toqtaldy. Atap aıtqanda, algorıtmderdi qoldanýdy baqylaý jáne olardyń qyzmetkerlerdiń jeke ómirine aralasýyna jol bermeý qajettigin atap ótti.
Budan bólek, EO elderinde tsıfrlyq ekonomıka jaǵdaıynda, ásirese ózin-ózi jumyspen qamtyǵandar men platformalyq jumyspen aınalysatyn azamattardy áleýmettik qorǵaý máseleleri talqylanyp jatyr.
- Áleýmettik qorǵaý, qaýipsizdik jáne áleýmettik áriptestik jasandy ıntellektini engizýdegi negizgi elementter. JI-diń damýy tek baqylaý men protsesterdi ońtaılandyrýǵa emes, sonymen qatar qyzmetkerlerdiń ómir súrý sapasyn arttyrýǵa baǵyttalýy tıis, - dep túıindedi ol.
Aıta keteıik, eńbek qaýipsizdigin saqtamaǵan jumys berýshilerge 428 mln teńgeden astam aıyppul salyndy.
