JI dáýirinde de joǵary bilim alý mańyzdy – Baǵdat Mýsın
ASTANA. KAZINFORM – Qazaqstannyń sporttyq baǵdarlamalaý federatsııasynyń prezıdenti Baǵdat Mýsın jasandy ıntellekt dáýirinde joǵary bilimniń mańyzy saqtala ma degen saýalǵa jaýap berdi.
Onyń pikirinshe, jasandy ıntellekt pen baǵdarlamalaý salasyndaǵy bilim kez kelgen mamandyqqa qosymsha qajetti daǵdyǵa aınalýy tıis.
— Joǵary bilim mindetti túrde qajet. Biraq kompıýterlik ǵylymdar, baǵdarlamalaý jáne jasandy ıntellekt salasyndaǵy daǵdylar mansap qurýdy josparlaǵan kez kelgen adam úshin aýadaı qajet ekenin túsinýimiz kerek. Al fızıka, hımııa, bıologııa sııaqty salalarda tereń bilimniń mańyzyn eshkim joqqa shyǵarmaıdy. Mundaı bilimdi mektep qabyrǵasynan bastap tereńdetip ıgerýge bolady.
Sondyqtan másele joǵary bilimniń qajet-qajet emestiginde emes, onyń qandaı maqsat úshin qajet ekeninde, – dedi Mýsın Jasandy ıntellekt boıynsha halyqaralyq olımpıada (IOAI) kýlýarynda.
Federatsııa basshysynyń aıtýynsha, bolashaqtaǵy iri ǵylymı jańalyqtardy jasandy ıntellekt quraldaryn meńgergen mamandar jasaıdy.
— Bıologııany tereń oqyp júrgen balalarymnyń birine vaıb-kodıng pen jasandy ıntellektti de meńgerýge keńes berdim. Bul oǵan keıin farmatsevtıka men bıologııa ǵylymdarynda jańalyq ashýǵa múmkindik beredi. Aldaǵy ýaqytta eń úlken jetistikter tehnologııalar men ǵylymdardyń toǵysqan tusynda dúnıege keledi. Eki-úsh ǵylym salasy ózara ushtasqanda jańa jańalyqtar men tyń bıznes-ıdeıalar paıda bolady, – dedi federatsııa basshysy.
Eske salaıyq, 2-8 tamyz kúnderi Astanada Jasandy ıntellekt boıynsha úshinshi halyqaralyq olımpıada (IOAI-2026) ótedi. Oǵan álemniń 106 elinen kelgen mektep oqýshylary qatysady.
Buǵan deıin B. Mýsın IOAI-2026 olımpıadasy bolashaq tehnologııalyq kóshbasshylar men kásipkerlerdi tárbıeleýge yqpal etetinin aıtqan edi.
