JI dáýirinde adamdy adam etetin qasıet qandaı - Lı Kaı Fý úsh mańyzdy keńes aıtty

Mektep oqýshylary aldynda sóz sóılegen sarapshy osydan 44 jyl buryn nelikten ómirin jasandy ıntellekt salasyna arnaýdy sheshkenin túsindirdi.

— 44 jyl buryn JI boıynsha aspıarntýraǵa túsýge ótinish berdim. Sol kezde ótinishimde «Jasandy ıntellekt — adamzattyń ózin-ózi tanýǵa jasaǵan sońǵy qadamy» dep jazǵan edim. Men bul senimimnen jasandy ıntellektige qyzyǵýshylyq tómendegen eki kezeńde aınyǵan joqpyn. Bizdiń býyn qazirgi JI negizin qalady. Al osy irgetastyń adamzatty qaıda bastaıtynyn aıqyndaý — sizderdiń býyndaryńyzdyń enshisinde, — dedi ol.

Ashylý saltanatynda Lı Kaı Fý olımpıada qatysýshylaryna keleshekke qatysty úsh keńes aıtty.

— Birinshiden, jańa dúnıeni múmkindiginshe tez úırenýge umtylyńyzdar. Bul sala kóz ilespes jyldamdyqpen damyp keledi. Osynda kelýlerińizge sebep bolǵan qabiletterińizdi múlde jańa quzyretterdi meńgerýge paıdalanyńyzdar. Ár jetistikti jańa oqý kezeńiniń bastaýy retinde qabyldańyzdar. Bilim eskiredi, al bilýge qushtarlyq máńgi qalady, — dedi halyqaralyq sarapshy.

Sondaı-aq Lı Kaı Fý oqýshylarǵa JI-di óz oılaý qabiletiniń ornyn basatyn qural emes, gıpotezalardy tekserýge jáne jańa sheshimder tabýǵa kómektesetin zııatkerlik seriktes retinde paıdalanýǵa keńes berdi.

— JI-di óz oılaryńyzdy almastyratyn qural emes, zııatkerlik seriktes retinde qoldanyńyzdar. Oǵan óz aqyl-parasattaryńyzǵa laıyq suraqtar qoıyńyzdar. Birge gıpotezalar usynyńyzdar. Kez kelgen boljamǵa — ózderińizdiń de, JI-diń de tujyrymdaryna kúmánmen qarańyzdar. Sonda siz de, JI de jeke-dara qol jetkize almaıtyn qorytyndylarǵa birge kele alasyzdar, — dedi ol.

Sóz sońynda ǵalym jas zertteýshilerdi JI tehnologııalaryn qoldanýda jaýapkershilikti óz moınyna alýǵa shaqyrdy. Onyń pikirinshe, oqýshylar JI-ge qandaı mindet júkteletinin ózderi anyqtap, onyń jumysynyń saldaryn baǵalaı bilýi kerek.

— JI agentterin basqaryńyzdar. Olardyń aldyna maqsat qoıyńyzdar. Shekteýlerdi belgileńizder. Nátıjelerin baǵalańyzdar. JI júıeleri jumysty oryndaı alady, biraq ol úshin jaýapkershilik ala almaıdy. Ózińiz úshin shyn máninde mańyzdy mindetterdi tańdańyzdar jáne qatelikterdiń yqtımal táýekeli men saldaryn túsinińizder, — dedi ol.

Sheteldik sarapshynyń aıtýynsha, olımpıadaǵa qatysýshylardyń kóbi ýnıversıtetti aıaqtaǵansha JI modelderi bir ǵana durys jaýaby bar tapsyrmalardy adamdardan áldeqaıda jaqsy oryndaıtyn deńgeıge jetedi.

— Aralaryńyzdaǵy keıbireýler 25 jasqa jetkende, búgingi kúni iri kompanııalardyń ózinde joq esepteý qýatyna qol jetkizedi. Másele ondaı múmkindiktiń bolýynda emes. Eń mańyzdysy — ony qandaı maqsatqa jumsaıtyndaryńyz. Jetistikterińizdi maqtan tutyńyzdar. Biraq óz bolmystaryńyzdy «bólmedegi eń aqyldy adammyn» degen túsinikke negizdemeńizder. Óıtkeni kóp uzamaı bul ataqqa mashına da laıyq bolýy múmkin. Onyń ornyna tulǵalaryńyzdy qoıatyn suraqtaryńyz, kóz aldaryńyzǵa elestetetin bolashaq jáne óz moıyndaryńyzǵa alýǵa daıyn jaýapkershilik arqyly qalyptastyryńyzdar. Sizder JI dáýirine jaı ǵana qadam basqan joqsyzdar, onyń qandaı bolatynyn aıqyndaý mindeti de senip tapsyrylyp otyr. Sondyqtan bul dáýirdi aqyldy ǵana emes, adamgershiligi mol dáýirge aınaldyryńyzdar, — dep túıindedi ol.

Aıta keteıik, Astanada ótip jatqan JI olımpıadasyna 106 eldiń komandasy jınaldy.

Buǵan deıin Qazaqstannyń sporttyq baǵdarlamalaý federatsııasynyń prezıdenti Baǵdat Mýsın IOAI-2026 olımpıadasy bolashaq tehnologııalyq kóshbasshylar men kásipkerlerdi tárbıeleýge yqpal etetinin aıtqan edi.