JI dárigerdiń biliktiligin arttyratynyna senimdimin – Erbol Ospanov

ASTANA. KAZINFORM – Elimizdegi medıtsına ýnıversıtetterinde bolashaq dárigerlerge jasandy ıntellektini qoldaný joldary úıretiledi. Bul týraly Kazinform agenttiginiń BIZDIÑ ORTA podkastynda Densaýlyq saqtaý vıtse-mınıstri Erbol Ospanov aıtty.

- Medıtsınalyq ýnıversıtetterimizde jasandy ıntellekt tetikterin qoldanýdy úıretýdi josparlap otyrmyz. Bul bizdiń emes, zamannyń qalaýy. Sondyqtan eń aldymen árbir medıtsınalyq qyzmetkerdiń keleshekte jasandy ıntellektimen jumys isteý múmkindigi jáne quzyreti bolýy tıis. Ekinshiden, kóp azamat zerthanadan analızderin alǵannan keıin ártúrli jasandy ıntellekt servısterine engizip, nátıjesin, kórsetkishterdiń normaǵa saı, saı emestigin qaraıtyny ras. Sol arqyly dári izdeıtini nemese qandaı mamanǵa júginý qajettigin bilýge tyrysatyndary bar. Oǵan shekteý qoıa almaımyz, ár azamattyń quqyǵy. Menińshe, medıtsına qyzmetkerlerimiz odan zardap shekteıdi. Óıtkeni, ChatGPT nemese jasandy ıntellektisi bar servısterdi paıdalanǵan kezde ol medıtsına qyzmetkerleriniń biliktiligin arttyrýǵa kómek bere alady. Óıtkeni suraqty durys qoısańyz bárin túsindirip jazyp beredi. Sizdiń ýnıversıtette úırenbegen dúnıeńizdi túsindirip berý múmkindigi bar, - dedi vıtse-mınıstr.

Ol elimizdegi medıtsınalyq qyzmetkerlerdiń biliktiligine kúmán keltiretin azamattardyń da kezdesetinin jasyrǵan joq. 

- Bes saýsaq birdeı emes, ondaı jaǵdaılar da bolyp jatqan shyǵar. Biraq jasandy ıntellekt medıtsına qyzmetkerleriniń biliktiligin arttyrýǵa, sapaly qyzmet kórsetýine zor úles qosaryna senimdimin. Munan bólek, qazirdiń ózinde shetelde, Qazaqstannyń ózinde medıtsınalyq uıymdarda jasandy ınttelektini paıdalanatyn aqparattyq júıeler qoldanysta. Onyń bárin otandyq dárigerler qoldanyp, jumysynda paıdalanyp júr, - dedi Erbol Ospanov.

Aıta keteıik, ShQO-da jasandy ıntellekt dárigerlerge dıagnoz qoıýǵa kómektesip jatyr.