JI damýy: Qytaıda robottarǵa arnalǵan derekter ortalyqtary kóbeıip keledi
ASTANA. KAZINFORM — Qytaıda adamtárizdi robottar salasynda serpilis jasaý úshin JI derekterin jınaý ortalyqtary keń aýqymda salynyp jatyr, dep habarlaıdy Sınhýa.
Ótken jyl Qytaı úshin adamtárizdi robottardy jappaı óndirýdiń alǵashqy jyly boldy: 140-tan astam otandyq óndirýshi 330-dan asa túrli model usyndy. Alaıda bul jetistikterge qaramastan, mundaı robottardy jappaı kommertsııalandyrýǵa kedergi keltirip otyrǵan basty másele – derekter tapshylyǵy.
Osy máseleni sheshý úshin Qytaı mýltımodaldi derekterdi jınaıtyn ulttyq ortalyqtar jelisin belsendi túrde damytyp jatyr. Bul eldiń «robot óndirýden» «robottandyrylǵan ıntellektke» kóshý strategııasynyń mańyzdy bóligine aınaldy.
Mundaı ınfraqurylymnyń aıqyn mysaly – Sychýan provıntsııasynyń Tszygýn qalasynda ashylǵan adamtárizdi robottarǵa arnalǵan kópfýnktsıonaldy derekter jınaý jáne synaq ortalyǵy. Aýmaǵy 6 myń sharshy metr bolatyn nysan bıyl 8 qańtarda jumysyn bastady jáne naýryz aıynda tolyq qýatyna shyǵýdy josparlap otyr. Ortalyq zamanaýı qural-jabdyqtarmen qamtamasyz etilgen: robot býyndaryndaǵy kúsh datchıkteri, joǵary dáldiktegi RGB-D kórý júıeleri men lıdarlar arqyly derekter barynsha naqty jınalady.
Tolyq qýatynda ortalyq kúnine 15 myń jazba, jylyna 3 mıllıonǵa deıin joǵary sapaly derek jınaı alady. Bul derekter robottardy naqty óndiristik jaǵdaılarda — júk suryptaý, zattardy ustaý, tasymaldaý jáne dál ornalastyrý sııaqty operatsııalarǵa úıretý úshin qoldanylady.
Derekter jınaý ortalyqtaryn damytý memlekettik deńgeıde qoldaý tabýda. Qytaı adamtárizdi robottar men «endirilgen» jasandy ıntellekttiń tolyq óndiristik tsıkli men ómirlik kezeńin qamtıtyn ulttyq standarttar júıesin engizdi. Bul standarttar tehnıkalyq talaptardy, baǵalaý ólshemderin jáne ózara áreket etý hattamalaryn birizdendirip, salanyń bytyrańqylyǵyn azaıtady.
Mundaı ortalyqtar eldiń túrli qalalarynda qarqyndy túrde ashylyp jatyr. Atap aıtqanda, Beıjiń, Shanhaı, Tıantszın, Gýanchjoý, Lıýchjoý, Tszıýtszıan, Ýsı, Ýhan, Shaosın jáne Chjenchjoý qalalarynda da osyndaı derekter jınaý alańdary quryldy.
Jalpy, adamtárizdi robottar ındýstrııasy álem boıynsha bir ortaq máselege tap bolyp otyr — naqty ortada oqytýǵa qajetti derekterdiń jetispeýi. Mundaı derekterdi jınaý kóp qarjy men ýaqytty talap etedi: bir ǵana derek jınaý sessııasynyń quny 1000 ıýannan (shamamen 145 AQSh dollary) asady, al qarapaıym operatsııalardy úıretý úshin ondaǵan myń áreket qajet.
Qytaı ortalyqtary bul máseleni aralas tásilmen sheshýde: adam VR-qurylǵylar arqyly qashyqtan basqarýdy jáne avtomatty derek jınaýdy qatar qoldanady. Bul jasandy ıntellekt modelderin tıimdi oqytýǵa, algorıtmderdi jetildirýge jáne robottardyń túrli jaǵdaılarǵa beıimdiligin arttyrýǵa múmkindik beredi.
2026 jyldyń aqpan aıynyń sońyna qaraı Sychýan provıntsııasynda robototehnıkaǵa qatysty 1138 kásiporyn tirkelgen.
Budan buryn Qytaıda robototehnıka nazaryn mehanıkadan basqarý júıelerine aýdara bastaǵanyn jazǵanbyz.
