JI-di durys paıdalanbasaq, adamzatqa qarsy qarýǵa aınalady — Álıhan Báımenov

ASTANA. KAZINFORM — Jasandy ıntellektti durys baǵytta paıdalanbasaq, ol adamzatqa qarsy jumys isteýi múmkin. Bul týraly búgin «KISI GPS: Gylym. Pikir. Sayasat» ulttyq saraptamalyq alańynyń otyrysynda Astana memlekettik qyzmet haby Basqarýshy komıtetiniń tóraǵasy málimdedi.

— Jańa tehnologııa — úlken múmkindik pen ıgilik. Biraq onyń ekinshi jaǵy da bar. Eger ony durys paıdalanbasa, adamzatqa qarsy jumys isteıtin qarýǵa aınalyp ketýi múmkin. Sondyqtan da ıadrolyq tehnologııany ıgergen kezde onyń paıdalanylýyn retteıtin túrli zańdar qoldanysqa endi. Endi jasandy ıntellekt zamanynda da memleketter men halyqaralyq qaýymdastyqtar jańa zańdardy júzege asyryp jatyr. Ony paıdalanýdyń shegi qandaı? JI-di adamzat ıgiligine aınaldyrý úshin ne isteýimiz kerek? Prezıdenttiń Joldaýynda jasandy ıntellektke basymdyq berýi — zaman talaby. Bizdiń jasandy ıntellektti barlyq salada paıdalanýymyz memleketaralyq básekelestikte, jahandyq jarystarda Qazaqstannyń alǵa shyǵýyna negiz bola alady. Biraq ony durys paıdalana alýymyz kerek, — dedi Álıhan Báımenov.

Aıta keteıik, aqpan aıynan bastap ár stýdent jasandy ıntellekt kýrsynan ótýge mindetti.