JI-di birlesip damytý EAEO-nyń tehnologııalyq progresine qýatty serpin beredi – Sadyr Japarov
ASTANA. KAZINFORM – Qyrǵyz Respýblıkasynyń Prezıdenti Sadyr Japarov Joǵary Eýrazııalyq ekonomıkalyq keńestiń keńeıtilgen quramdaǵy otyrysynda odaq aıasyndaǵy qatynastardy tsıfrlandyrý bastamalaryn Bishkektiń de qoldaıtynyn aıtty.
- Eýrazııalyq ekonomıkalyq odaqtyń ortaq naryq keńistigine aınalýǵa ǵana emes, tehnologııalyq seriktestik pen birlesken ınnovatsııalardyń platformasy bolýǵa, jańa ósim qalyptastyrýǵa áleýeti jetkilikti ekenine senimdimin. Jasandy ıntellektini birlesip damytý odaqtyń tehnologııalyq qadamyna qýatty serpin beretinine senim bildiremiz, - degen Sadyr Japarov odaq elderi Azııa men Afrıkanyń birneshe memleketimen tikeleı saýda naryǵyn túze alǵanyn eske saldy.
Sondaı-aq, ol odaq naryǵyn lıberaldandyrý ishki óndirýshilerdi osaldyqqa tap keltirmeý kerek degen oı aıtty.
- Álemdik tájirıbe aıqyn kórsetken. Óndiris bazasyn birge nyǵaıtpastan naryqtardy ashý ónerkásip áleýetin joǵaltýǵa ákeledi. Qazir bizde ónerkásip salasyndaǵy kooperatsııalyq jobalarda paıyzdyq mólsherlemelerdi sýbsıdııalaý quraly bar. Bul tetik agroónerkásip keshenine de engiziledi. Alaıda EAEO aıasyndaǵy kooperatsııa iri bıznestiń alańy bolyp qalyp otyr. Shaǵyn jáne orta bıznes odaqtyń iri kásiporyndarynyń jetkizilim tizbegine kire almaı otyr. Ekonomıkasy osal eldiń aýmaǵynda óndiristi jergiliktendirý jobalar is júzinde júrip jatqan joq. Jyl aıaǵyna komıssııa birlesken óndiristik qýattardy ekonomıkasy osal elderdiń aýmaǵynda jergiliktendirýge yntalandyratyn tetikter usynady dep úmittenemiz, - dedi Qyrǵyz Respýblıkasynyń Prezıdenti.
Aıta keteıik, Astana qalasynda Qazaqstan tóraǵalyǵy aıasynda Joǵary Eýrazııalyq ekonomıkalyq keńestiń eki kúndik otyrysy ótip jatyr.
