JI baqylaýdan shyqty: Cursor agenti kompanııanyń derekqoryn birneshe sekýndta óshirip tastady
ASTANA. KAZINFORM — Anthropic kompanııasynyń Claude Opus negizinde jumys isteıtin JI-agenti PocketOS kompanııasynyń korporatıvtik derekqoryn birneshe sekýnd ishinde joıyp jibergen. Keıin óz qateligin moıyndap, keshirim suraǵan, dep habarlaıdy Euronews.
Avtokólikti jalǵa berý bıznesine arnalǵan baǵdarlamalyq qamtamasyz etýdi ázirleıtin PocketOS kompanııasy 30 saǵattan astam ýaqytqa sozylǵan aýyr tehnıkalyq aqaýǵa tap boldy. Buǵan baǵdarlamalaý tapsyrmalaryn avtomattandyrýǵa arnalǵan Cursor avtonomdy JI-agenti sebep bolǵan.
Claude Opus modeliniń negizinde jumys isteıtin agent standartty operatsııany oryndaý kezinde máseleni «óz betinshe» sheshýge tyrysyp, kompanııanyń derekqoryn rezervtik kóshirmelerimen qosa joıyp jibergen.
PocketOS negizin qalaýshy Djer Kreınniń aıtýynsha, bul áreketke deıin eshqandaı rastaý suraýy jasalmaǵan.
— Buǵan bar bolǵany toǵyz sekýnd ketti, — dep jazdy Kreın X áleýmettik jelisinde.
Oqıǵadan keıin agentten túsinikteme suralǵanda, ol negizgi qaýipsizdik erejelerin buzǵanyn moıyndaǵan. Júıe paıdalanýshynyń naqty kelisiminsiz joıqyn áreketterdi buǵattaýy tıis qorǵanys mehanızmin elemegeni atap ótiledi. JI derekqordy joıý «eń qaıtymsyz áreket» ekenin aıtyp, máseleni sheshý úshin aldymen ruqsat suraýy nemese qaýipsiz ádis tańdaýy kerektigin moıyndaǵan.
Saldarynan PocketOS klıentteri ýaqytsha mańyzdy aqparattarǵa qol jetkize almaǵan: sońǵy úsh aıdaǵy brondar men jańa paıdalanýshy tirkeýleri joǵalyp ketken.
Kreın bul máseleni júıelik problema dep atady.
— Bul bir ǵana sátsiz agent nemese API týraly emes. Sala JI-agentterin senimdi qaýipsizdik arhıtektýrasyn qurýǵa qaraǵanda tezirek engizip jatyr, — dedi ol.
Kompanııa oqıǵadan eki kún ótken soń joǵalǵan derekterdi qalpyna keltirdi.
Aıta keteıik, elimizdegi ulttyq kompanııalarda ónerkásiptik qaýipsizdikti arttyratyn JI elementteri engiziledi.
