JI baǵytynda 10 mlrd teńgege 62 joba iske asyrylyp jatyr - mınıstr
ASTANA. KAZINFORM - Qazir jasandy ıntellekt salasyndaǵy zertteýlerge 500-ge jýyq ǵalym jumyldyryldy. Bul týraly QR Ǵylym jáne joǵary bilim mınıstri Saıasat Nurbek málim etti.
- Úkimet jasandy ıntellektini damytýǵa baǵyttalǵan ǵylymı zertteýlerdi júıeli túrde qoldap keledi. Qarjylandyrý maqsatty jáne granttyq baǵdarlamalar arqyly júzege asýda. Qazirgi ýaqytta jasandy ıntellekt baǵyty boıynsha jalpy quny 9,7 mlrd teńgeni quraıtyn 62 joba iske asyrylyp jatyr. Negizgi oryndaýshylar qatarynda Ál-Farabı atyndaǵy Qazaq ulttyq ýnıversıteti, L.N. Gýmılev atyndaǵy Eýrazııa ulttyq ýnıversıteti, Aqparattyq jáne esepteýish tehnologııalar ınstıtýty, Astana IT University jáne basqa da ýnıversıtetter men ǵylymı-zertteý uıymdary bar. Mańyzdysy — 26 jobany 40 jasqa deıingi jas ǵalymdar júzege asyrýda. Bul jańa býyn zertteýshileriniń belsendiligin kórsetedi. Jobalar ǵylymnyń jeti basym baǵytyn qamtıdy. Sonyń ishinde jasandy ıntellekt zertteýleri negizinen ozyq óndiris, tsıfrlyq tehnologııalar jáne ǵarysh salasyna shoǵyrlanǵan, - dedi S. Nurbek Májilistegi parlamenttik tyńdaý kezinde.
Onyń aıtýynsha, qazir jasandy ıntellekt salasynda 11 óńirdiń 27 ýnıversıteti men 6 ǵylymı ınstıtýty belsendi jumys istep jatyr. Zertteýlerge barlyǵy 479 ǵalym tartylǵan.
- Jobalar medıtsına, aýyl sharýashylyǵy, robototehnıka, kólik ınfraqurylymy sııaqty túrli salalardy qamtıdy, - dedi vedomstvo basshysy.
Aıta keteıik, Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda bilim berý salasyndaǵy JI qyzmetin zańmen retteý qajettigin atap ótti.