JI arqyly baqylaý: endi elimizde zańsyz qurylys salý múmkin bolmaıdy
ASTANA. KAZINFORM – 2026 jyly elimizde egjeı-tegjeıli josparlaý jobalaryn iske asyrýdy jasandy ıntellekt baqylap otyratyn bolady. Bul týraly Ónerkásip jáne qurylys vıtse-mınıstri Qýandyq Qajkenov aıtty.
– Mınıstrlik jasandy ıntellektti paıdalana otyryp, bas jospardy jáne egjeı-tegjeıli josparlaý jobalaryn iske asyrýdan keıingi baqylaý tehnologııasyn pılottyq joba retinde júzege asyrýdy josparlap otyr. Atap aıtqanda, eldi mekenderdiń aýmaǵyn qaraý kezinde kompıýterdiń múmkindigin qoldaný kózdelip otyr. Alynǵan nátıje (jergilikti jerdiń tsıfrlyq modeli) júıede egjeı-tegjeıli josparlaýdyń tsıfrlyq jobasymen jáne bas josparmen salystyrylýy kerek, - dedi ol Úkimet otyrysynda.
Vıtse-mınıstrdiń aıtýynsha, osylaısha eldi mekenderde zańsyz salynǵan nysandardy ońaı anyqtaýǵa bolady.
— Qala qurylysy jobalaryna qaıshylyq faktileri anyqtalǵan jaǵdaıda, júıe memlekettik sáýlet-qurylys baqylaý organdaryna qajetti sharalardy qoldaný úshin habarlama jiberedi. Bul tehnologııa qajetti qujattarsyz zańsyz qurylysty anyqtaýdyń qosymsha quraly bolady. Osy pılottyq jobany 2025 jyly aıaqtaýdy josparlap otyrmyz. Al 2026 jyly ony zańnamalyq turǵydan bekitýdi jáne óńirlerge taratý qarastyrylǵan, - dep túıdi sózin Qýandyq Qajkenov.
Sondaı-aq budan bylaı qalalarda salynyp jatqan nysannyń áýelgi jobasynan jáne salyný maqsatynan aýytqymaýy úshin qurylys obektisiniń biregeı nómiri engiziledi.