JI arqyly áskerge irikteý, áskerı tirkeýdi avtomattandyrý – Qorǵanys salasy qalaı tsıfrlanyp jatyr
ASTANA. KAZINFORM – Elimizde Qorǵanys salasyna da jasandy ıntellekt birtindep engizilýde. Máselen áskerı boryshyn óteýshilerdi irikteý JI-ge júktelip jatyr. Sondaı-aq alǵashqy áskerı tirkeýge qoıý sekildi buryn mamandar jeke-jeke qolmen toltyratyn jumystar tsıfrlyq tehnologııanyń kómegimen avtomattandyryla bastaǵan. Bundaı jobalardyń arqasynda memleket qyrýar qarjy únemdep otyrǵany da belgili boldy. Áskerı saladaǵy osy jáne ózge de tsıfrlyq bastamalar jaıly Jibek joly arnasyndaǵy arnaıy reportajda aıtyldy.
— Osy jyldyń aıaǵyna deıin Qorǵanys mınıstrliginde jasandy ıntellekt bólimshesin qurǵaly jatyrmyz. Negizi bizdiń mınıstrlik jasandy ıntellektini qorǵanys salasyna engizip jatqanyna birneshe jyl boldy. Sondaı jobalardyń sany ulǵaıǵan saıyn arnaıy bir bólim qurý qajettiligi týyndady. Sondyqtan qazir kadrlardy irikteýden ótkizip, tańdap, daıarlaý ústindemiz. 5-6 jaqsy maman alamyz degen oıymyz bar. Olar jasandy ıntellekt jobalaryn júrgizetin bolady, - deıdi QR Qorǵanys mınıstriniń orynbasary Darhan Ahmedıev.
Sondaı-aq ol áskerı boryshyn óteýden bosatylǵan azamattardy habarlandyrý avtomattandyrylǵanyn atap ótti.
– Qazir biz ózimizdiń aqparattyq júıemizdi quryp, ony basqa memlekettik organdardyń aqparattyq júıelerimen ıntegratsııalap, kimniń áskerden bosatylý múmkindigi bar ekenin anyqtap otyrmyz. Bular negizinen stýdentter, jylyna shamamen 700 myń stýdent áskerden bosatylady. Odan bólek naýqastar, úılengen, bala-shaǵasy bar azamattar. Olardy biz aqparattyq júıede bólek kategorııaǵa iriktep, stýdentterge sms joldaǵan bolatynbyz, – dedi Darhan Ahmedıev.
Onyń aıtýynsha, Qorǵanys mınıstrliginiń memlekettik qyzmet kórsetý salasy birtindep proaktıvti júıege aýysyp jatyr.
— Azamattyń aryzynsyz ony áskerden bosatý múmkin boldy. Mekenjaıyn aýystyrǵan kezde, ony áskerı komıssarıattar avtomatty túrde tirkeıdi. Al jumysqa ornalasqanda, bizge kelmeı-aq kadr bólimderi málimetterdi aqparattyq júıeden ala alady. Osylaısha, tek qana osy bir protsesti proaktıvti túrge aýystyrǵannyń arqasynda qazir memleket jylyna 1 mlrd teńgeden astam qarjyny únemdep otyr, – deıdi Qorǵanys mınıstriniń orynbasary.
Odan bólek spıker qazirgi tańda 17 jastaǵy bozbalalar alǵashqy áskerı tirkeýge turý úshin eshqaıda barmaıtynyn, bári onlaın formatta avtomatty túrde jasalatynyn atap ótti.
Sondaı-aq elimizde endi áskerge shaqyrylatyn jastardy jasandy ıntellekt irikteıtini belgili boldy. Elektrondyq bazaǵa engizilgen azamattardyń bilimi, boıy, salmaǵy, otbasylyq jaǵdaıy syndy málimetter sarbazdyń qandaı ásker túrine jaraıtynyn anyqtaýǵa múmkindik bermek.
– Barlyq memlekettik júıelerden kelip jatqan derekterden jasandy ıntellekt olardyń qaı salada, qaı ásker túrine jaraıtynyn anyqtap otyrady. Densaýlyǵy, boıy, kóziniń kórýi, qulaǵynyń estýi, qaı jaqqa qabileti bary sekildi málimetterdi esepteı otyryp, jasandy ıntellekt qazirgi komıssııaǵa usynys beredi. Ary qaraı komıssııa ózderi sheshim qabyldaıdy. Mysaly desant-shabýyldaýshy ásker sapyna qabyldaý úshin sarbazdyń boıy uzyn, densaýlyǵy jaqsy bolýy kerek. Al baılanys salasy mamandyqtaryna jiberetin bolsaq, ol jaqta estý qabileti jaqsy bolýy kerek. Bul júıe qazir testileýden ótkizilip jatyr, jaqyn arada iske qosamyz dep otyrmyz, – deıdi QR QM Aqparattyq tehnologııalar departamentiniń bastyǵy Bekjan Myrzaǵalıev.
Aıta keteıik, buǵan deıin Qazaqstan qalaı tsıfrlyq habqa aınalyp kele jatqany jaıly jazǵan edik.