JI áleýmettik mańyzy bar azyq-túlik ónimderin satý kezinde tıimsiz deldaldardy anyqtaýǵa kómektesedi
ASTANA. KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarın tóraǵalyq etken ınflıatsııany turaqtandyrý jónindegi kezekti keńeste áleýmettik mańyzy bar azyq-túlik ónimderin satýǵa júrgizilgen memlekettik baqylaýdyń nátıjeleri qaraldy. Búl týraly Úkimettiń baspasóz qyzmeti habarlady.
Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, jyl basynan beri 2 myńnan astam elektrondy shot-faktýrany taldaý nátıjesinde áleýmettik mańyzy bar azyq-túlik taýarlaryna saýda ústemesin qoldaný talaptaryn buzý boıynsha 631 derek anyqtalǵan.
Tek aqpan aıynyń ózinde elektrondy shot-faktýralar boıynsha 760-tan astam táýekel tirkelgen.
— Qazirgi tańda biz jasandy ıntellekt kómegimen saýda ústemesiniń shekti mólsherden asýy faktilerin ǵana emes, áleýmettik mańyzy bar azyq-túlik ónimderi boıynsha jasalatyn saýda mámileleriniń sanyn da taldap otyrmyz. Máselen, eger bir kún ishinde bir taýar boıynsha birneshe mámile jasalsa, olardyń jalǵan bolýy yqtımaldyǵy joǵary. Naýryz aıynyń alǵashqy jartysynyń ózinde tıimsiz deldaldarǵa qatysty 56 ákimshilik is tirkelip, tıisti memlekettik organdarǵa joldandy, — dedi Aıjan Bıjanova.
Jalpy alǵanda, naýryz aıynyń basynan beri áleýmettik mańyzy bar azyq-túlik taýarlary baǵasynyń ortasha ósý ındeksi 0,2% boldy. Bul ótken jyldyń osy kezeńindegi kórsetkishten (0,5%) tómen.
Saýda jáne ıntegratsııa mınıstrligi sút ónimderiniń baǵasyn turaqtandyrý maqsatynda Tabıǵı monopolııalardy retteý komıteti, Azyq-túlik korporatsııasy, Aýyl sharýashylyǵy mınıstrligi jáne Qazaqstan Temirjoly ulttyq kompanııasymen birlesip, salany qoldaýǵa baǵyttalǵan keshendi sharalardy pysyqtap jatyr. Kókónis baǵasynyń maýsymdyq ósýin tejeý úshin erte pisetin ónimderdi ımporttaýǵa arnalǵan «jasyl dáliz» engizilgen. Sonymen qatar olardy kedendik bajsyz ákelý múmkindigi de qarastyrylyp jatyr.
Naýryz merekesine oraı respýblıka boıynsha 200-den astam jármeńke ótkizý josparlanǵan. Sonymen qatar 13–23 naýryz aralyǵynda saýda úıleri men saýda ortalyqtarynda Nauryz Sale aktsııasy uıymdastyrylýda.
Sondaı-aq jıynda Almaty oblysyndaǵy azyq-túlik ınflıatsııasynyń jaǵdaıy qaraldy. Bul óńir baǵa ósimi boıynsha aımaqtar arasynda tórtinshi orynda tur. Munda azyq-túlik taýarlary boıynsha ınflıatsııa 11,7% deńgeıinde qalyptasqan (bir aıda +1,5%). Jyl basynan beri sábiz (41,1%), kartop (14,6%), qyzanaq (13%), balyq (12,6%), qyryqqabat (9,7%) jáne basqa da azyq-túlik túrlerinde tirkelgen. Jalpy alǵanda, 21 taýar pozıtsııasy boıynsha baǵa ósken, onyń 18-i boıynsha kórsetkish eldegi ortasha deńgeıden joǵary.
Vıtse-premer Serik Jumanǵarın Almaty oblysy ákimi orynbasarynyń baǵany turaqtandyrý boıynsha qabyldanyp jatqan sharalar men usynystaryn tyńdady. Ol azyq-túlik ınflıatsııasyn turaqtandyrý eń aldymen óńirlerdiń júıeli ári naqty jumysyna baılanysty ekenin atap ótti. Óńirler jergilikti óndirýshilermen jáne jetkizýshilermen tyǵyz baılanysta jumys istep, týyndaǵan máselelerdi jedel sheshý arqyly halyq úshin baǵanyń turaqtylyǵyn qamtamasyz etýi tıis ekenin aıtty.
Aıta ketelik Qazaqstanda azyq-túlik ınflıatsııasy 12,7%-ǵa deıin tómendedi.
