JI-agenttiń bir ózi mıllıard dollardyq kompanııalar qura alady – BAÁ mınıstri

AI Everything Abu Dhabi forýmynda mınıstr BAÁ halqynyń salystyrmaly túrde az bolýyna baılanysty týyndaıtyn shekteýlerdi JI-agentter arqyly eńserýge bolatynyn aıtty.

JI-agentter adamnyń múmkindigin, daǵdylary men yqpalyn «birneshe ese arttyra» alady. Bul BAÁ sııaqty elderge halqy júzdegen mıllıon jáne odan da kóp iri naryqtarmen básekelesýge múmkindik beredi.

— Bir adam men birneshe JI-agentten turatyn, quny 20 mln dollar nemese tipti mıllıardtaǵan dollarǵa jetetin kompanııalardyń ashylǵanyna kýá bolamyz. Eger biz adamdarǵa olardyń múmkindigin, daǵdylary men yqpalyn birneshe ese arttyratyn agentter arqyly artyqshylyq bere alsaq, ekonomıkalyq turǵyda iri oıynshylarmen básekelese alamyz, — dedi Omar ál-Olama.

Mınıstrdiń aıtýynsha, bul ózgerister qazir-aq BAÁ-degi jumys oryndarynda baıqala bastaǵan. Ol osy aptada Ábý-Dábıdegi kompanııalardyń birine barǵanyn mysal retinde keltirdi.

Kompanııa qyzmetkerleriniń 10% astamyn JI-agentter quraıdy. Agentter tapsyrmalardy «birneshe ese joǵary jyldamdyqpen» oryndap, eńbek ónimdiligi men sheshim qabyldaý sapasyn arttyrýǵa yqpal etedi.

Bul málimdemeler BAÁ-niń memlekettik sektor men bıznes salasyna agent JI-di belsendi engizip jatqan tusynda aıtyldy. Sáýirde BAÁ Mınıstrler kabıneti eki jylda memlekettik sektorlar men operatsııalardyń 50%-da JI-agent engizý josparyn jarııalaǵan bolatyn.

Maýsym aıynda BAÁ-de Jasandy ıntellekt jáne derekter jónindegi basqarma qurylyp, onyń tóraǵasy qyzmetine ál-Olama taǵaıyndaldy. Basqarma JI, derekter jáne tsıfrlyq memlekettik basqarý salalaryndaǵy ulttyq baǵyttar men basymdyqtardy aıqyndaýǵa jaýap beredi.

O. ál-Olamanyń aıtýynsha, mundaı ózgeris dástúrli bızneske ǵana emes, oıyn-saýyq salasyna da áser etedi. Buryn úlken komanda men qomaqty qarjyny qajet etetin jobalardy endi JI arqyly jeke adamnyń ózi júzege asyryp, óz stýdııasyn qura alady.

— Tarıhı turǵyda oıyn-saýyq kontentin óndirý belgili bir naryqtarǵa shoǵyrlanǵan. Mysaly, Gollıvýd, Úndistandaǵy Bollıvýd nemese Ońtústik Koreıadaǵy óndiris ortalyqtary tanymal. Eger adamdarǵa osy quraldardy paıdalanyp, daǵdylaryn jetildirýge jáne damytýǵa múmkindik bersek, olardyń keńinen taralýyna qol jetkize alarymyzǵa senemin, — dedi ol.

Onyń aıtýynsha, JI kómegimen jasalǵan oıyn-saýyq kontenti salasynda alǵash kósh bastaıtyn naryq osy tehnologııany keńinen tarata alǵan elde qalyptasady.

ál-Olama Instagram men Snapchat jelilerinen JI kómegimen túsirilgen fılmder men serıaldar jarnamasyn kórgenin aıtty. Mundaı kontent kórermendi az ǵana ýaqytta qyzyqtyra alady. Mınıstr shaǵyn toptar nemese jeke adamdar JI kómegimen stsenarıı jazyp, sıýjettiń birneshe nusqasyn jasap, kontentti jedel jarııalaı alatyn model qalyptasyp jatqanyn aıtty. Mysaly kelimsekter, dınozavrlar, tyńshylar men nındzıalar taqyryby qaıtalanyp otyrady.

— Naryqqa kirýdegi kedergi aıtarlyqtaı azaıdy. Endi oıyn-saýyq salasynda bir adamnan turatyn stýdııalar qaıta paıda bolyp, álemdi ózgerte alatyn tańǵajaıyp kontent jasaı alady, — dedi ol.

Sonymen birge, spıker memleketterdiń mundaı kontenttiń ulttyq talaptarǵa saı bolýyn baqylaýdy jalǵastyrýy qajet ekenin moıyndady.

Ámirlikterdiń JI salasyn qalaı damytpaq

Omar ál-Olama JI-di paıdalanýdan bas tartqan elder men adamdar tehnologııalyq damýdan qalyp qoıýy múmkin ekenin eskertti. Onyń pikirinshe, JI-di tek baqylap, retteý jetkiliksiz, onyń múmkindikterin is júzinde ekonomıkaǵa engizý qajet. Áıtpese tehnologııanyń qarqyndy damýy el ekonomıkasyna keri áser etýi múmkin.

— Eger eshteńe istemeseńiz, «Men bul revolıýtsııanyń bir bóligi bolǵym kelmeıdi» deseńiz, onyń ekonomıkańyz ben qoǵamyńyzǵa áseri qandaı bolady? 99% jaǵdaıda onyń saldary jaısyz bolady, — dedi ol.

Onyń aıtýynsha, jańa jaǵdaıǵa beıimdelmegen qyzmetkerler jumysynan aıyrylýy múmkin. Al JI-di paıdalanýdan bas tartqan elder ekonomıkalyq múmkindikterdi basqa memleketterge berip qoıý qaýpine ushyraıdy.

— Bizdiń ustanymymyz qarapaıym — osy tolqyndy tıimdi paıdalanǵysy keletin ár adam bul tehnologııany túsinip, qoldana bilýi kerek jáne odan paıda tabýy qajet. Sondyqtan Birikken Arab Ámirlikteri JI-men jumys isteý daǵdylaryn arttyrýǵa baǵyttalǵan aýqymdy strategııa júrgizip jatyr, — dedi ol.

Atap aıtqanda, el 80 myń memlekettik qyzmetshini oqytýdy josparlap otyr. Olar JI-agentter quryp, JI modelderin tıimdi paıdalana alatyn «sýperpaıdalanýshylarǵa» aınalýy kerek.

Sondaı-aq BAÁ Microsoft kompanııasymen birlesip, kelesi aıda 1 mıllıon adamdy oqytýǵa baǵyttalǵan naýqannyń aıaqtalýǵa jaqyn. Bul adamdar «JI-diń sýperqozǵaýshy kúshine» aınalýǵa tıis.

ál-Olama Qazaqstandaǵy JI kómegimen túsirilgen fılmder festıvali týraly da aıtyp ótti. Onyń sózinshe, bir adamnyń ózi dástúrli túrde úlken komandany, tipti mıllıondaǵan dollardy qajet etetin fılm nemese basqa da kontent jasaı alǵan. Mundaı quraldar adamdardyń ózin tanytý tásilderin ózgertip, áleýmettik jelide ınflıýenser bolýdy qajet etpeı-aq kontentten tabys tabýdyń jańa múmkindikterin qalyptastyra alady.

Mınıstr BAÁ-niń JI salasyndaǵy jetistigin kompanııalardyń quny nemese eńbek ónimdiliginiń artýymen ǵana ólshenbeıtinin aıtýda.

— Biz úshin jeńis — múmkindiginshe kóp adamnyń ómirin jaqsy jaqqa ózgertý. Eger adamdar JI týraly aıtylǵan saıyn nemese ol engizilgen saıyn ómir sapasynyń jaqsaryp jatqanyn kórse, olardyń kózqarasy da múlde ózgeshe bolady, — dedi ol.

Mınıstrdiń aıtýynsha, kóptegen esepter men zertteýlerde BAÁ JI-ge degen optımızm deńgeıi boıynsha birinshi orynda tur. Bul kórsetkishti saqtap qalý úshin JI-di engizýdiń adamdardyń ómirine oń áserin qamtamasyz etý qajet.

Zııatkerlik menshik salasyndaǵy erejelerdi qaıta qaraý qajet

Mınıstrdiń aıtýynsha, JI-diń qarqyndy damýy úkimetterdi zııatkerlik menshikti qorǵaýdyń qoldanystaǵy tetikterin qaıta qaraýǵa májbúrlep otyr.

Onyń aıtýynsha, zııatkerlik menshikti qorǵaýdyń qazirgi júıesi adamdar jasaǵan ónertabystardy ózgelerdiń zańsyz kóshirip alýyna jol bermeý úshin qalyptasqan. Alaıda buryn bul júıeler jańa ónim men sheshimderdi ózdiginen jasaı alatyn JI sııaqty tehnologııanyń áreketin retteý máselesine tap bolǵan emes.

Onyń sózinshe, zııatkerlik menshikti qorǵaýdyń dástúrli júıeleri ónertapqyshtardyń eńbegin basqa adamdardyń kóshirip alýynan qorǵaý úshin qurylǵan. Alaıda buǵan deıin bul júıeler jańa nátıjeler jasaı alatyn adamǵa jat júıeniń qyzmetin retteý qajettiligimen betpe-bet kelgen emes.

— Adamzat tarıhynda osy ýaqytqa deıin jansyz nysannyń óz betinshe qandaı da bir dúnıe jasaı alýy múmkin bolmaǵan. Sondyqtan qazir osy quqyqtardyń mánin qaıta qarap, qoldanystaǵy qorǵaý tetikterin jańartyp, olardyń qazirgi jaǵdaıǵa qanshalyqty saı keletinin baǵalaıtyn kez keldi dep oılaımyn, — dedi ol.

Ol mysal retinde zymyran jasaý jáne elektr qozǵaltqyshtaryn óndirý sııaqty salalarǵa arnalǵan kúrdeli ınjenerlik sheshimderdi ázirleı alatyn JI júıelerin atady. Mınıstrdiń aıtýynsha, mundaı ázirlemeler bolashaqta kommertsııalyq turǵydan tabysty kompanııalardyń negizine aınalýy múmkin.

Mınıstr JI modelderin oqytýǵa qoldanylatyn derekterdiń sıpaty da tez ózgerip jatqanyn aıtty. Qazirdiń ózinde JI jasaǵan sıntetıkalyq derekter oqytýǵa paıdalanylatyn derekterdiń basym bóligin quraıdy.

— JI ózi jasaıdy, ári ony JI ózi paıdalanady. Al bolashaqta bul ómirimizdiń qalypty qubylysyna aınalady. Úkimetter bir jaǵynan shyǵarmashylyqpen aınalysatyn adamdardyń quqyqtaryn qorǵaıtyn, ekinshi jaǵynan JI-di qoǵamǵa paıdaly nátıjeler ákeletin baǵytta qoldanýǵa yntalandyratyn júıe qalyptastyrýy qajet, — dedi O. ál-Olama.

JI jáne saılaý 

Ál-Olama BAÁ-de saılaý kezinde JI-di qoldanýǵa qoıylatyn talaptar týraly da aıtty.

Onyń sózinshe, kandıdattar JI-di ár qoldanǵan jaǵdaıyn tirkep, bul týraly belgilengen merzimde esep berýge mindetti. JI-di tek óz saılaý naýqany men qyzmetine qatysty maqsatta paıdalanýǵa bolady. Al ony basqa kandıdatqa zııan keltirý, onyń bedeline nuqsan keltirý nemese oǵan qarsy áreket jasaý úshin qoldanýǵa tyıym salynady.

Mınıstrdiń aıtýynsha, bul talaptar JI-di jalǵan aqparat taratýǵa nemese bopsalaýǵa paıdalanýdyń aldyn alyp, kandıdattardyń tehnologııany qalaı qoldanǵany úshin jaýapkershiligin qamtamasyz etýge baǵyttalǵan.

Úkimet syrttan keletin jańa ıdeıalarǵa ashyq bolýy kerek

Kezdesý sońynda Omar ál-Olama áleýmettik jobalarmen aınalysatyn uıymdar JI-di engizýdegi olqylyqtardyń ornyn toltyrý úshin úkimetpen qalaı birlese alady degen suraqqa jaýap berdi jáne memlekettik organdardyń halyqqa qoljetimdi ári jańa ıdeıalarǵa ashyq bolýy keregin aıtty.

— Úkimet jańa ıdeıalardy quptap, onyń damýyna úles qosqysy keletin adamdardy qoldap, olardyń usynystaryn qabyldaýy kerek. AI Camp jáne UAE Codes sııaqty memlekettik platformalar, sondaı-aq túrli ınkýbatorlar men akseleratorlar qazirdiń ózinde azamattar men uıymdarǵa memlekettik bastamalarǵa aralasýǵa múmkindik berip otyr, — dedi spıker.

Onyń aıtýynsha, memleket únemi ózgerip, damyp otyrady. Bul shaǵyn ózgeristerden bastap aýqymdy reformalarǵa deıingi úderisti qamtıdy. Sondyqtan úkimet týyndaǵan máselelerge tez beıimdelip, jedel jaýap berý úshin syrtqy uıymdarmen de yntymaqtastyq ornatýy qajet.

Osyǵan deıin Oman Sultanynyń Qazaqstannyń jasandy ıntelekt salasyndaǵy jetistikterine qyzyǵýshylyq tanytqany týraly jazdyq.