JI agentterine qatysty daý: OpenAI men Anthropic basshylary Aýstralııa Senatyna shaqyryldy
ASTANA. KAZINFORM — OpenAI basshysy Sem Altman men Anthropic kompanııasynyń jetekshisi Darıo Amodeı Aýstralııa Senatynyń jasandy ıntellekt pen derekter ortalyqtaryna arnalǵan otyrysyna shaqyryldy.
Buǵan OpenAI ázirlegen JI agentteriniń Aýstralııa men AQSh-taǵy memlekettik júıelerge zańsyz kirýine qatysty oqıǵalar sebep boldy. Bul týraly The Guardian habarlaıdy.
Senator Sara Henson-ıAng basqaratyn komıssııanyń bul otyrysy 1 qazan kúni Kanberrada ótedi. Altman men Amodeı JI qaýipsizdigi jáne avtonomdy júıelerdiń jumysyna qatysty suraqtarǵa jaýap beredi.
OpenAI kompanııasynyń qyzmetine qatysty alańdaýshylyq Aýstralııadaǵy JI agentine baılanysty oqıǵadan keıin kúsheıe tústi. Maýsym aıynda agent birneshe memlekettik júıege, sonyń ishinde Medicare portalyna zańsyz kirgen.
Sonymen qatar Aýstralııa densaýlyq saqtaý jáne áleýmettik qamsyzdandyrý ınstıtýtynyń, Vıktorııa shtatynyń densaýlyq saqtaý departamentiniń jáne Jańa Ońtústik Ýels shtatyndaǵy Qylmys statıstıkasy jáne zertteýler bıýrosynyń saıttary da nysanaǵa alynǵan.
Bul rette azamattardyń jeke medıtsınalyq derekteri jarııa bolǵan joq. OpenAI oqıǵa týraly tamyz aıynda bilgenimen, Aýstralııa bıligine bul jóninde tek qyrkúıekte málimdegen. Kompanııa bolǵan jaıdy táýligine bir ret tekseriletin jalpyǵa ortaq elektrondyq poshta arqyly habarlaǵan.
Aýstralııa premer-mınıstri Entonı Albaneze OpenAI-den bolǵan jaǵdaıǵa qatysty túsinikteme berýdi talap etti. Onyń pikirinshe, mundaı oqıǵalar jasandy ıntellektiniń damýyn baqylaýda ustaý úshin ulttyq jáne halyqaralyq deńgeıde naqty sharalar qabyldaý kerek ekenin ańǵartady.
Albaneze buǵan deıin Sem Altmanmen sóıleskenin de aıtty. Onyń sózinshe, OpenAI basshysy qaýipsizdik máselelerin odan ári talqylaýǵa daıyn ekenin jetkizgen.
Tergeý OpenAI men Anthropic kompanııalarynyń Aýstralııa úkimetimen júrgizip jatqan kelissózderimen qatar ótip jatyr. Kompanııalar JI-di damytý úshin jergilikti resýrstar men derekterge qoljetimdilikti keńeıtýge múddeli. Al bılik olardyń eldegi jumysyn odan ári keńeıtý múmkindigin talqylap jatyr.
Aýstralııanyń qorshaǵan orta mınıstri Mıýrreı Ýott OpenAI-diń áreketin quptamady.
Onyń aıtýynsha, kompanııa mundaı oqıǵalar týraly jurtshylyqqa ashyq ári jedel aqparat berip, óz tehnologııalaryna degen senimdi qaıta qalyptastyrýy qajet.
Sonymen qatar Senattaǵy tergeý tek OpenAI men Anthropic kompanııalarymen shektelmeıdi. Komıssııa jasandy ıntellektini damytý jáne Aýstralııada derekter ortalyqtaryn salý máselelerin de qarastyryp jatyr.
Buǵan deıin Anthropic kompanııasynyń basshysy Darıo Amodeı qaýipsizdikke qatysty alańdaýshylyq kúsheıip otyrǵandyqtan, jasandy ıntellektiniń eń qýatty júıelerin ázirleý qarqynyn baıaýlatý qajet ekenin aıtqan edi.
Onyń bul usynysyn OpenAI basshysy Sem Altman men Ilon Mask ta qoldaǵan.
