JHL: «Saryarqanyń» búgingi qarsylasy - «Zaýrale»
ASTANA. 6 jeltoqsan. QazAqparat - Búgin Qaraǵandy qalasynyń «Saryarqa» hokkeı klýby syrt alańda «Zaýrale» (Reseı, Qorǵan qalasy) komandasymen kezdesedi.
Aıta ketken jón, buǵan deıin Qaraǵandy qalasynda ótken oıynda «Saryarqa» bul komandany 2:1 esebimen jeńgen bolatyn. Ol matchtyń ekinshi kezeńinde «Saryarqanyń» hokkeıshileri bir oıynshyǵa kem oınap júrip-aq, qarsylasyn qapy qaldyrǵan. Esep - 1:0. Degenmen, úshinshi kezeńde tarazy basy teńesti. Matchtyń negizgi ýaqytynda jeńimpaz anyqtalmasa da, overtaımda, ıaǵnı qosymsha ýaqytta «Saryarqa» óz sheberligin barynsha tanyta bildi. «Zaýraleniń» bir hokkeıshisi erejeni buzyp, eki mınýttyq aıyp ýaqytyn óteýge attanǵanda, «Saryarqanyń» bas bapkeri taımaýt aldy. Sodan bir mınýttyń aınalasynda Qaraǵandy qalasynyń hokkeı klýby óz basymdyǵyn iske asyra bildi. Kırıll Lebedev ekinshi shaıbany soǵyp, komandany jeńiske jeteledi. Qorytyndy esep - 2:1.
Negizi, «Zaýrale» Qurlyqtyq hokkeı lıgasynyń aýtsaıderi bolyp sanalady. Ol áli kúnge deıin jalpytýrnırlik kesteniń sońǵy satysynan shyǵa almaı keledi. Komanda 19 upaımen eń tómengi 26-shy orynda tur. Al «Saryarqanyń» enshisinde 47 upaı bar. Qaraǵandy qalasynyń hokkeı klýby týrnır kestesinde 9-shy orynda keledi.
