JHL: «Saryarqa» lıganyń favorıti - «Kýban» komandasyn jeńdi
ASTANA. 8 qazan. QazAqparat - Qaraǵandy qalasynyń «Saryarqa» hokkeı klýby syrt alańda «Kýban» (Krasnodar) komandasyn tize búktirdi.
Búginde Krasnodar qalasynyń hokkeı klýby Joǵary hokkeı lıgasynyń favorıti bolyp sanalady. Lıganyń jalpy týrnırlik kestesinde ol 20 upaımen úshinshi orynda tur. Al osy matchqa deıin «Saryarqa» bes ret qatarynan utylyp, úsh-aq ret jeńiske jetken bolatyn. Komanda týrnırlik kesteniń eń sońǵy ornyna túsip, aýtsaıderler qatarynda da boldy. Soǵan qaramastan, qaraǵandylyq klýb osy joly naǵyz batyldyq tanytyp, lıganyń favorıti - «Kýban» komandasyn tize búktirdi. Bul match asa tartysty ótti. «Saryarqa» esepti birinshi bolyp ashqanymen qarsylastar tarazy basyn teńestire bildi. Al ekinshi kezeńniń basynda «Kýban» alǵa shyqty. Degenmen, qaraǵandylyq klýb jankúıerlerin jerge qaratpady. Esep teńesti - 2:2. Alty mınýttyń ishinde qarsylastar eki birdeı shaıbamen taǵy da alǵa shyqty. Biraq úshinshi kezeńniń alǵashqy mınýttarynda «Saryarqa» esepti teńestirip ketti. Al oıynnyń aıaqtalýyna on mınýt qalǵan kezde qarsylastar qaqpashysy qapy qaldy. Esep - 5:4. Osydan keıin «Kýban» esesin qaıtaryp, oıyndy qosymsha ýaqytqa ulastyrýǵa barynsha tyrysty. Alaıda degenine jete almady. Bul machta «Saryarqanyń» mereıi ústem boldy. Búginde «Saryarqa» jalpy týrnırlik kestede joǵary qaraı kóterilip keledi. Sońǵy oıynnan keıin ol taǵy úsh upaıǵa qol jetkizip, 12 upaımen 20-shy orynǵa shyqty.
