JHL: «Saryarqa» hokkeı klýby úzdik bestikke endi
ASTANA. 13 jeltoqsan. QazAqparat - Sońǵy oıynda Lıpetsk qalasynyń qurama komandasyn jeńgen Qaraǵandy qalasynyń «Saryarqa» hokkeı klýby jalpytýrnırlik kestede 4-shi orynǵa kóterildi.
Osymen «Saryarqa» óz qarsylasyn ekinshi ret jeńip otyr. Bul jolǵy oıyn da asa tartysty ótti. Matchtyń birinshi kezeńinde Qaraǵandy qalasynyń hokkeı klýby «Lıpetsk» komandasynyń qaqpasyna úsh birdeı shaıba salyp, ekinshi kezeńniń basynda 0:4 esebimen basym tústi. Úshinshi kezeńge deıin qarsylastar esep aıyrmasyn bir shaıbaǵa deıin jetkize bildi. Alaıda tarazy basyn teńestire almady. Qorytyndy esep - 3:4.
Bul oıynnan keıin «Saryarqa» taǵy úsh upaıǵa qol jetkizip, Joǵary hokkeı lıgasynyń jalpytýrnırlik kestesinde 4-shi orynǵa kóterildi. Onyń enshisinde 53 upaı bar. Búgin «Saryarqa» óz alańynda Saratov qalasynyń «Krıstall» komandasyn qabyldaıdy.
