JHL: «Saryarqa» hokkeı klýby «Dınamony» jeńdi
ASTANA. 6 qazan. QazAqparat - Keshe Qaraǵandy qalasynyń «Saryarqa» hokkeı klýby syrt alańda «Dınamo BShH» (Máskeý oblysy, Balashıha qalasy) komandasyn jeńdi.
Chempıonattyń basynda «Saryarqanyń» saly sýǵa ketkenin bári biledi. Ótken maýsymnyń favorıti retinde qaraǵandylyq klýb Joǵary hokkeı lıgasynyń bıylǵy dodasyn ashý qurmetine de ıe bolǵan. Birinshi matchta ol «Bratına» kýbogynyń ıegeri «Torospen» kezdesip, býllıt serııasynda utylǵan bolatyn. Sodan «Saryarqanyń» joly bolmady. Komanda jeti ret qatarynan jeńilip, jalpy týrnırlik kestede eń sońǵy orynǵa túsken edi. Al segizinshi oıynda «Rıazan» komandasynan 6:1 esebimen basym túsip, eńsesi kóterildi. «Dınamo BShH» hokkeı klýbymen ótkizgen matchta da «Saryarqanyń» qarqyny barynsha baıqaldy. Oıynnyń birinshi kezeńinde qarsylastyń qaqpasyna bir shaıba, al ekinshi kezeńniń basynda ekinshi shaıba soǵyldy. Esep - 2:0. Ekinshi kezeńniń sońyna deıin «Dınamo BShH»-nyń hokkeıshileri tarazy basyn teńestire bildi. Alaıda qaraǵandylyq klýbtyń qarqyndy shabýyldaryna shydaı almaı, úshinshi kezeńde taǵy eki shaıbany jiberip qoıdy. Qorytyndy esep - 4:2. Osy oıynnan keıin «Saryarqa» taǵy úsh upaıǵa ıe bolyp, jalpy týrnırlik kestede 26 komandanyń ishinen 22-shi orynǵa kóterilip otyr.
