JHL: «Saryarqa» favorıtterdi qýyp keledi
ASTANA. 15 qarasha. QazAqparat - Qaraǵandy qalasynyń «Saryarqa» hokkeı klýby syrt alańda «Lıpetsk» (Reseı, Lıpetsk qalasy) komandasyn jeńdi.
Bul oıynda qarsylastar esepti birinshi bolyp ashyp, alǵa shyqty. Degenmen, ekinshi kezeńniń basynda tarazy basy teńesti. Esep - 1:1. Sodan bastap eki komanda bir-birine qyrǵıdaı tıip, shabýyldaryn barynsha údetti. Biraq esep úshinshi kezeńde de ózgermedi. Overtaımda, ıaǵnı qosymsha ýaqytta da jeńimpaz anyqtalǵan joq. Býllıt serııasynda «Saryarqanyń» qaqpashysy Vladımır Kovach qarsylastyń barlyq soqqylaryn sheber qaıtara bildi. Al Vıtalıı Aab shaıba soǵyp, óz komandasyna jeńis ákeldi. Qorytyndy esep - 2:1. «Saryarqa» taǵy eki upaıǵa qol jetkizdi.
Búginde 20 oıynnan keıin «Saryarqa» hokkeı klýbynda 34 upaı bar. Joǵary hokkeı lıgasynyń jalpytýrnırlik kestesinde komanda 10-shy orynǵa kóterilip, favorıtterge jaqyndap keledi.
