JHL: «Qaztsınk-Torpedo» - «Neftıanık» oıynynda býlıttiń rekordtyq soqqylary jasaldy
ASTANA. 12 qyrkúıek. QazAqparat - Joǵary hokkeı lıgasy aıasynda Óskemen qalasynyń «Qaztsınk-Torpedosy» ekinshi ret jeńiske jetti. Bul joly olar reseılik «Neftıanık» quramasynan basym tústi.
Oıyn asa tartysty ótti. Match barysynda birde «Qaztsınk-Torpedo», birde «Neftıanık» bir shaıbamen alǵa shyǵyp, jankúıerlerdiń júıkesin juqartty. Birinshi kezeńde bizdiń hokkeıshiler kózge tússe, ekinshi kezeń qarsylas komandanyń paıdasyna sheshildi. Al úshinshi kezeńde «Qaztsınk-Torpedo» taǵy bir shaıba soǵyp, 3:2 esebimen jeńip jatty. Alaıda sońǵy mınýttarda tarazy basy teńesti. 3:3. Qosymsha ýaqytta bizdiń hokkeıshilerde talaı múmkindikter boldy. «Qaztsınk-Torpedo» bir, tipti eki oıynshyǵa artyq oınady. Degenmen, «Neftıanıktiń» qaqpashysy barlyq shabýyldardy sheber toıtara bildi. Sosyn býllıt serııasy belgilendi. Munda sońǵy jyldardaǵy eń kóp - 18 býllıt soqqysy jasaldy. Jankúıerler qaqpashylardyń asa tartysty básekesine kýá boldy. Al Aleksandr Voljankınniń mergendigi arqasynda «Qaztsınk-Torpedo» bul oıynda jeńiske jetti. Qorytyndy esep - 4:3 (B) Sonymen, eki oıynnan keıin Óskemen qalasynyń «Qaztsınk-Torpedosy» taǵy eki upaıǵa ıe bolyp, jalpy týrnırlik kestede ekinshi orynǵa kóterildi.
