JHL: «Qaztsınk-Torpedo» kezekti qarsylasyn aıqyn basymdyqpen jeńdi
ASTANA. 8 qazan. QazAqparat - Óskemen qalasynyń «Qaztsınk-Torpedo» hokkeı klýby óz jankúıerlerin taǵy bir márte qýantty. Kezekti matchta ol «Býran» (Voronej) komandasyn aıqyn basymdyqpen jeńdi.
Oıynnyń birinshi kezeńinde «Qaztsınk-Torpedonyń» hokkeıshileri qarsylastardyń qaqpasyna úsh birdeı shaıba soǵyp, alǵa shyqty. Ekinshi kezeńde esep ózgermedi. 3:0. Al úshinshi kezeńde Óskemen qalasynyń hokkeı klýby shaıbalardy qarsha boratyp, taǵy úsh shaıbany soǵyp ketti. «Býran» onyń bárine tek bir shaıbamen ǵana jaýap bere aldy. Qorytyndy esep - 6:1. Sóıtip, «Qaztsınk-Torpedo» taǵy úsh upaıdy oljalap, jalpy týrnırlik kestede oq boıy ozyq tur. Komandanyń enshisinde 30 upaı bar. Al lıga chempıony - «Toros» odan 8 upaıǵa qalyp keledi.
