JHL: «Qaztsınk-Torpedo» hokkeıshileri «Ermakty» tize búktirdi
ASTANA. 27 qyrkúıek. QazAqparat - Joǵary hokkeı lıgasynyń jańa maýsymy aıasynda Óskemen qalasynyń «Qaztsınk-Torpedosy» kezekti oıynyn Angarsk qalasynda ótkizip, jergilikti «Ermak» komandasyn jeńdi.
Bul oıynda «Qaztsınk-Torpedo» birinshi bolyp esep ashty. Alaıda «Ermak» matchtyń ekinshi kezeńinde tarazy basyn teńestirdi. Al úshinshi kezeńde bir shaıbamen alǵa shyqty. Esep - 1:2. Degenmen Óskemen qalasynyń hokkeı klýby óz shabýyldaryn údetip, úsh mınýtta qarsylastarymen teńesti. «Ermak» taǵy bir shaıbamen (2:3) alǵa shyqty. Biraq oıynnyń aıaqtalýyna on mınýt qalǵanda «Qaztsınk-Torpedonyń» hokkeıshileri esepti teńestirdi. Sodan eki komanda bir-birine quıyndaı orap soǵyp, bir shaıbany bolsa da, salyp ketýge tyrysty. «Ermaktyń» komandasynyń 7 myńǵa jýyq jankúıeri de biraz demeý jasady. Degenmen, bul tartysta Qazaqstan komandasynyń mereıi ústem boldy. Oıynnyń sońyna nebári eki mınýttaı ýaqyt qalǵanda, «Qaztsınk-Torpedo» qarsylastar qaqpashysyn qapy qaldyrdy. Osydan keıin «Ermak» óskemendik klýbtyń qorǵanysyn buza almady. Qorytyndy esep - 4:3.
Osylaısha, «Qaztsınk-Torpedo» qatarynan jetinshi ret jeńiske jetti. Búginde komanda 20 upaımen Joǵary hokkeı lıgasynda kósh bastap tur.
