Jigitter, haıp – arzan, prank – qymbat: Orynsyz ázildiń jazasy qandaı
ASTANA. KAZINFORM – Búgin – 1 sáýir – kúlki kúni. Biraq ázildiń de shegi bar. Ol shek Qazaqstanda zańmen belgilengen dep aıtýǵa da bolady. Kazinform byltyr eldiń narazylyǵyn týdyrǵan parasatsyz pranktar men ádepke tompaq ázilderdiń bir parasy nemen aıaqtalǵanyna sholý jasady.
Astanadaǵy eń rezonansty jaǵdaılardyń biri turǵyn úı kesheninde bolǵan. Blogerler qarańǵy lıftke máıit maketi men balta qoıyp, kezdeısoq adamdy shoshytqan. Oqıǵa polıtsııaǵa deıin jetip, uıymdastyrýshy 30 táýlikke qamaýǵa alyndy, qalǵan qatysýshylar 15 táýlikke qamaldy.
Osyǵan uqsas taǵy bir jaǵdaıda 26 jastaǵy astanalyq turǵyn lıft ishinde qorqynyshty kostıým kıip, qyzdyń úreıin ushyrǵan. Áleýmettik jelige júktelgen vıdeo taǵy da tártip saqshylarynyń nazaryna iligip, er adam ustaldy. Sot ony 10 táýlikke qamady.
Taǵy bir jaǵdaı áýejaıda tirkeldi. Almaty turǵyny reıske tirkelý kezinde «tyıym salynǵan zattar bar ma» degen suraqqa «ıá» dep ázildegen. Oıynnan ot shyǵyp, áýejaıdyń jumysy biraz ýaqytqa tejelgen. «Ázilqoı» jolaýshy «usaq buzaqylyq» babymen jaýapqa tartyldy.
Bloger Arýjan Aıbekovanyń Qytaıda túsirgen prank vıdeolary da sátsiz aıaqtaldy. Ol kóshede adamdarǵa bildirmeı telefon ustatyp, keıin «urladyńyz» dep shoshytqan. Onymen shektelmeı, beıtanys adamdardyń qolynan ustap, denesine janasyp, ersi áreketin jelige jarııalaǵan. Bul áreketter Qytaı qoǵamynda synǵa ushyrap, jeke shekarany buzý retinde qabyldandy. Aqyry bloger sátsiz vıdeolardy óshirip tyndy.
Keıin ol Ózbekstanda da osyndaı prank túsirip, ákimshilik jaýapqa tartyldy. 78 myń teńge aıyppul tólegen. Endi bloger qyz Qazaqstanmen shekaralas elderde mundaı prank túsirmeıtin bolypty.
Ázil formatyndaǵy «qara jarnama» da kópshiliktiń kóńilinen shyǵa qoımady. Almatydaǵy erlerdiń kıimin satatyn dúken ıeleri «zorlyq» taqyrybyn qoldanǵan rolık jarııalap el nazaryn aýdarmaq bolǵan. Vıdeoda kıimder «zorlyq qurbandarynda bolǵan zattar» dep sıpattalǵan. Qoldanýshylar muny orynsyz ári shekten shyqqan kontent dep baǵalap, jappaı shaǵymdanǵan.
Іshki ister mınıstrliginiń málimetinshe, zańdaǵy jazaǵa qaramastan, mundaı jaǵdaılar jıilep barady. 2025 jyldyń alǵashqy jartysynda ǵana 24 adam ákimshilik jaýapkershilikke tartylǵan.
Al depýtattar zańǵa tompaq prank jasaǵandardyń akkaýntyn buǵattaýdy usynyp júr.
