Jezqazǵannyń bas veterınary maldan brýtsellez anyqtamaý úshin para suraǵan
QARAǴANDY. QazAqparat - Jezqazǵannyń «Veterınarııa bólimi» memlekettik mekemesiniń basshysy eki mal sharýashylyǵy ıesinen úsh ret para alǵan. Olardyń birine tekseris júrgizbeýge jáne sharýashylyqtan brýtsellez anyqtamaýǵa ýáde bergen, dep habarlaıdy QazAqparat.
Sotta mal sharýashylyǵy ıesi atalǵan másele boıynsha oryn alǵan jaǵdaıdy baıandap berdi. Oǵan mal dárigerleri kelip, bes iri qaradan qan alyp, keıinnen telefon arqyly barlyq bes sıyrda brýtsellez anyqtalǵanyn habarlaǵan. Memqyzmetshi sharýashylyq ıesin iri qara maldy tómen baǵamen «Mádına» shujyq tsehyna tapsyrýdy májbúrlegen.
Birshama ýaqyt ótkennen keıin mal dárigerleri sharýashylyqqa qaıta kelip, taǵy 10 sıyrdan qan alǵan kórinedi. Osy joly da sıyrlarǵa «brýtsellez» dıagnozyn qoıǵan. Memorgannyń talaby boıynsha iri qara atalǵan shujyq tsehyna tapsyryldy.
«Men veterınarııa bóliminiń basshysyna baryp, sharýashylyǵymda bundaı tekseristerdi doǵarýdy talap ettim. Osy oraıda sıyrlardyń brýtsellezge shaldyqqanyna kúdikpen qaradym, sebebi jaqyn mańdaǵy sharýashylyqtardy bul indet baıqalmady jáne jalpy aýrý oshaǵy týraly málimet bolmady. Sáıkesinshe, tótenshe jaǵdaı jarııalanǵan joq», - dedi Jezqazǵanda ótken sotta mal sharýashylyǵynyń basshysy Aldııar Aıbekov.
Veterınarııa bóliminiń basshysy atalǵan azamatpen áńgime barysynda bireýlerge qaryzǵa kirip ketkenin, osy rette 200 myń teńge somasynda aqsha kerektigin aıtqan. Eger de atalǵan somadaǵy aqshany jınap berse, budan bulaı tekseris bolmaıtyndyǵyn, sondaı-aq osydan keıin mal sharýashylyǵynda indet anyqtalmaıtyndyǵyna ýáde bergen.
«Men oǵan 200 myń teńge berýge qaýqarsyz edim. Sebebi ettiń satylymy tómen bolǵandyqta, kiris bolmady. Osy oraıda 100 myń teńgege kelistik, alaıda birneshe kúnnen soń oǵan 50 myń teńge berdim jáne osydan keıin tólegen joqpyn», - dedi sotta A. Aıbekov.
Sonymen qatar veterınarııa bóliminiń basshysy Jezqazǵan turǵynynyń qorasyndaǵy sanıtarlyq jaǵdaıdy tekserý barysynda - 5 myń teńge, keıinnen taǵy da 10 myń teńge somasynda para alǵan.
«Sottalýshy óziniń paıdasy úshin, sondaı-aq tekserýlerdi toqtatý men para berýshilerge qoldaý bildirý maqsatynda para alyp júrdi», - dedi úkim shyǵarý kezinde Jezqazǵan qalalyq sotynyń sýdıasy Marat Kokýshev.
Osy oraıda isti bolǵan mal dárigeri kináli dep tanylyp, para somasynyń jetpis eselik kóleminde aıyppul taǵaıyndaldy (4 mln. 550 myń teńge). Munymen qosa ol ómir boıyna memlekettik qyzmette laýazymdardy atqarý quqyǵynan aıyryldy.
