Jezqazǵannyń 70 jyldyǵy mańyzdy 70 ispen atap ótiledi

JEZQAZǴAN. QazAqparat – Jezqazǵanda Qazaqstan Táýelsizdiginiń 30 jyldyǵyna oraı «Qalanyń 70 jyldyǵyna arnalǵan 70 mańyzdy is» jobasy ázirlendi. Jetpis tarmaq birneshe bólimge biriktirildi. Olardyń qatarynda joldardy jóndeý, jańa áleýmettik nysandardy ashý jáne sybaılas jemqorlyqqa qarsy kúres sharalary qarastyrylǵan, dep habarlaıdy QazAqparat tilshisi.

Baǵdarlamany birneshe jyl boıy – 2021-2024 jyldar aralyǵynda iske asyrý josparlanýda.

Jezqazǵanǵa ınvestıtsııalyq tartymdy qala mártebesin berý kózdelip otyr. Shahardyń sáýlet kelbeti men ınfraqurylymyn jaqsartyp qana qoımaı, kásipkerlik pen «jasyl» ekonomıkany damytýǵa kúsh salynbaq.

Mańyzdy isterdiń eń birinshi tarmaǵy - «Azamattardy turǵyn úımen qamtamasyz etý» bolyp tabylady. Jobany júzege asyrý barysynda 112 apatty úıdiń turǵyndary kóshiriledi. Daryndy balalarǵa arnalǵan «Órken» arnaıy mektebiniń oqýshylary úshin 200 oryndyq jataqhana salynady. Bıyl áleýmettik jaǵdaıy tómen otbasylarǵa 70 páter beriledi. Keńgir sý qoımasynyń sol jaǵalaýynda jańa qala salý josparlanýda. Bastapqyda 17 úı salynyp, sonyń arqasynda 744 otbasy baspanamen qamtylady.

Eski sý qubyrlary jańartylyp, jańa qalaishilik qubyrlar tóseledi. «Keri OSMOS» membranalyq sý tazartý tehnologııasyn engizý arqyly aýyz sýdyń sapasy jaqsarady. Sondaı-aq, káriz-tazartý qurylystaryn qaıta jańartý júrgiziledi. 2023 jylǵa Keńgir sý qoımasyn balshyqtan tazartý jumystaryn júrgizý josparlanǵan.

Bıyl Jezqazǵan - Qyzylorda (Qyzylorda - Pavlodar - Ýspenka - RF shekarasy tasjolynyń ýchaskesi) avtojolyn qaıta jańartý jumystary júrgiziledi. Bul qalanyń kólik tuıyǵynan shyǵýyna septigin tıgizedi. Elimizdiń ońtústik óńirlerimen taýar aınalymy artady.

Mańyzdy isterdiń qatarynda qalalyq avtojoldardy jóndeý jumystary da bar. Aǵymdaǵy jyly uzyndyǵy 28 shaqyrymdy quraıtyn 22 kóshede ortasha jóndeý júrgiziledi, 2022 jyly №1 jáne 2 jol ótpelerin qaıta jańartý josparlanǵan.

Gazdandyrý baǵdarlamasyn iske asyrý jalǵasýda, ol 2025 jyly aıaqtalýy tıis.

Kóptegen jańa áleýmettik nysandar salynyp, ashylady. Terekti stantsııasynda 80 oryndyq mektep ashylady. Jezqazǵanda úsh balabaqsha jáne Keńgir aýylynda bir balabaqsha jumys isteı bastaıdy. Bılik sondaı-aq 70 balalar oıyn alańyn ornatýǵa jáne sý qoımasynyń jaǵasynda jalpy qalalyq saıabaq ashýǵa ýáde berip otyr.

Osy jyldyń mamyr aıynda turmystyq zorlyq-zombylyqtyń aldyn alý boıynsha daǵdarys ortalyǵy esigin aıqara ashady. 2023 jyly 140 sportshyǵa arnalǵan jataqhanasy bar «SK NAMYS» QQ sport kesheni, 2024 jyly kórermenderge arnalǵan minbeleri bar 320 oryndyq jabyq fýtbol maneji salynýy tıis.

Ashyq aspan astyndaǵy «Steplag tarıhı kesheni» murajaıy men «Joshy han» tarıhı-mádenı kesheni jumys isteı bastaıdy.

Densaýlyq saqtaý salasyna qatysty: 2022 jyly Jezqazǵanda 62 tósektik onkologııalyq ortalyq iske qosylýy tıis. Perzenthanada, júkti áıelderdiń gınekologııa jáne patologııa bóliminde jáne shala týǵan balalardy kútý bóliminde kúrdeli jóndeý josparlanǵan. Olardyń barlyǵy kópbeıindi aýrýhana ǵımaratynda ornalasatyn bolady.

Jańa óndiristerdiń arqasynda jumys oryndary ashylady. Ónerkásiptik reagent shyǵaratyn hımııalyq zaýyt ashý josparlanǵan. Sondaı-aq qara mys kontsentrattaryn gıdrometallýrgııalyq óńdeýdiń tájirıbeli zaýyty men Jezqazǵan qurylys materıaldary zaýyty óz jumysyn bastaýy tıis.

Aýyl sharýashylyǵy damıtyn bolady. 200 gektarǵa deıin ósimdik sharýashylyǵy úshin egis alqaptaryn ulǵaıtý josparlanýda. 600 bas iri qara malǵa arnalǵan eki bordaqylaý alańy men jylyjaı kesheni salynady. Bıoelektrostantsııany, al 2024 jyly jel elektr stantsııasyn iske qosý josparlanýda.

Tsıfrlyq ahýaldyq ortalyq qurý josparlanǵan. Jańa formattaǵy Open Space-tiń ashylýy halyq úshin memlekettik qyzmetterdiń sapasy men qoljetimdiligin jaqsartýǵa baǵyttalatyn bolady.

«Mádenı-buqaralyq is-sharalardy uıymdastyrý» bólimi 15 jobany qamtıdy. Olardyń arasynda jerlester forýmy, Halyqaralyq teatrlar festıvali, Jaqsygeldi Seıilovtiń respýblıkalyq án oryndaýshylar baıqaýy jáne «ROBOLEND-2023» festıvali bar.