Jezqazǵannyń sý ınfraqurylymyn jańǵyrtýǵa 1,8 mlrd teńge bólindi — Úkimet
ASTANA. KAZINFORM — Úkimet rezervinen Ulytaý oblysynyń sýmen jabdyqtaý ınfraqurylymyn jańǵyrtýǵa 1,8 mlrd teńge bólindi. Tıisti qaýlyǵa Premer-mınıstr Oljas Bektenov qol qoıdy. Bul týraly Úkimettiń baspasóz qyzmeti málim etti.
Qarajat Prezıdenttiń halyqtyń ómir súrý sapasyn arttyrý jáne aýyz sýmen qamtamasyz etý jónindegi tapsyrmalaryn júzege asyrý maqsatynda Jezqazǵan qalasynyń sharýashylyq-aýyz sý tazartý qurylystaryn rekonstrýktsııalaýdy aıaqtaýǵa baǵyttalǵan.
Jumys istep turǵan keshen 1966 jyly paıdalanýǵa berilgen, jabdyqtyń tozýy 90%-ǵa jetti.
— Qazirgi ýaqytta nysanda uzyndyǵy 4 shaqyrym ınjenerlik jeliler (káriz, jylýmen jabdyqtaý, jaryqtandyrý) tartylyp, transformatorlyq qosalqy stansalar men taratý qurylǵylary salyndy. Súzilgen jáne aýyz sýǵa arnalǵan 4 rezervýar rekonstrýktsııalandy jáne paıdalanýǵa berildi, sorǵy jabdyǵy jańartyldy. Úkimet rezervinen bólingen qarajat nysannyń qurylys-montaj jumystaryn aıaqtap, 2026 jyly josparly paıdalanýǵa múmkindik beredi, — delingen habarlamada.
Jezqazǵannyń ınfraqurylymyn jańǵyrtý jónindegi jumys — halyqtyń sýmen jabdyqtaý qyzmetterine qoljetimdiligin qamtamasyz etý jónindegi júıeli jumystyń bir bóligi. 2024 jyldyń qorytyndysy boıynsha sapaly aýyz sýǵa qoljetimdilik: qalalarda — 99,4%, aýyldyq eldi mekenderde — 98%-dy quraıdy.
100% kórsetkishke qol jetkizý úshin 2025 jyly Úkimet respýblıkalyq bıýdjette 257 jobany júzege asyrýǵa 105,7 mlrd teńge qarastyrǵan. Budan bólek, Arnaýly memlekettik qordyń qarajaty esebinen 229 jobany júzege asyrýǵa qosymsha 135,8 mlrd teńge bólindi.
Úkimet bólingen qarajattyń ýaqtyly maqsatty ıgerilýin jáne Prezıdenttiń azamattardyń ál-aýqatyn jaqsartý jónindegi tapsyrmalaryn oryndaý úshin júrgiziletin jumystardyń sapasyn baqylaıdy.
Aıta keteıik, Ulytaý oblysynyń bıýdjeti 30 mlrd teńgege artty.