Jezqazǵannan shyǵar joldar qalaı jóndelýde
QARAǴANDY. QazAqparat - Qaraǵandy oblysynyń ákimi Erlan Qoshanov jumys sapary barysynda Qaraǵandy-Jezqazǵan avtojolyna jasalǵan jóndeý jumystarymen tanysty, dep habarlaıdy QazAqparat.
Oblys ákimdiginen málim etkendeı, atalmysh tasjolda ótken jyldan beri 389 shaqyrym jol jóndeldi. Joldyń jalpy uzyndyǵy 513 shaqyrymdy quraıdy.
«Kelesi jyly taǵy 60 shaqyrym jol bóligin jóndeýdi kózdep otyrmyz. Onyń 20 shaqyrymy Aqoı aýyly mańyndaǵy jolda qoldanylǵan «sýyq resaıklıng» ádisimen jóndeletin bolady. Sondaı-aq joldyń bir bóligin frezerlep, jabyndy aýystyramyz. Qalǵan jol bólikterin ádettegi jóndeý arqyly qalypqa keltiremiz. Aldyn ala esepteýler boıynsha jóndeý jumystaryna 800-900 mln teńgege jýyq qarajat qajet bolady. Sáıkes qujattardyń barlyǵyn jınap bolǵan soń, qarjylandyrýǵa ótinim jiberemiz. Jeltoqsanda merdiger kompanııalar arasynda baıqaý jarııalaımyz, - dedi «QazAvtoJol» UK» AQ Qaraǵandy oblystyq fılıalynyń dırektory Qanat Shaımın.
Sondaı-aq kelesi jyly Jezqazǵan-Qyzylorda avtojolynyń qatty tozǵan 20 shaqyrym bóligi jóndeledi dep josparlanýda. Buǵan qosa jol jóndeýshiler 2019 jyly Qarajal jáne Jáırem kentterine barar joldy qalypqa keltirýdi aıaqtaýdy kózdep otyr.
