Jezqazǵannan Balqash pen Túrkistanǵa áýe reısteri ashylady
JEZQAZǴAN. KAZINFORM — 2026 jyly Jezqazǵannan Balqash pen Túrkistan qalalaryna jańa áýe reısteri ashylady. Bul týraly Ulytaý oblysynyń ákimi Dastan Ryspekov eseptik kezdesýinde aıtty.
Onyń aıtýynsha, oblys qurylǵannan beri jańa 3 avtobýs marshrýty (Jańaarqa, Qarajal, Sarysý) men Shymkent qalasyna 1 avıamarshrýt ashylǵan bolatyn.
— Qazir oblys ortalyǵynan 4 baǵytta avıamarshrýttar uıymdastyrylǵan (Astana, Almaty, Shymkent, Qaraǵandy). Al 2026 jyly Balqash jáne Túrkistan qalalaryna áýe reısin ashý josparlanǵan, — dedi ákim elordada Ortalyq kommýnıkatsııalar qyzmetinde.
Jalpy oblys aýmaǵynda 29 avtobýs marshrýty uıymdastyrylǵan. Qalalyq qoǵamdyq kólikke bıyl 721 mln teńgege jańa avtobýstar satyp alyndy. Osylaısha qalalyq avtobýstar 42% jańartyldy.
Bıyl uzyndyǵy 316 shaqyrymǵa jetetin Qyzyljar-Moıynty jańa temirjol jelisiniń qurylysy bastaldy.
Premer-mınıstrdiń tapsyrmasyna sáıkes, bıyl oblys boıynsha 4 temirjol vokzalynda (Jezqazǵan, Qarajal, Jańaarqa, Qyzyljar) qurylys montajdaý jumystary júrgizilip jatyr.
Buǵan deıin Dastan Ryspekov Qyzylorda-Jezqazǵan avtojoly qashan qoldanysqa beriletinin aıtqan edi.
Sondaı-aq, Ulytaý oblysynyń bıýdjeti 30 mlrd teńgege artty.