Jezqazǵandyqtar qala kúnin atap ótýde
Jezqazǵannyń tarıhy tereńde jatyr. Mysty mekendegi jer qoınaýynyń baılyǵy qola dáýirinen belgili bolǵan. Jezqazǵan aımaǵynyń aýmaǵyn orys ǵalymdary, saıahatshylary, taý-ken ınjenerleri men geologteri, al 1946 jyldan bastap akademık Álkeı Marǵulan jáne onyń shákirtteri zertteı bastaǵan. Jezqazǵannyń qalyptasý tarıhynda Qanysh Sátpaevtyń qaldyrǵan izi erekshe. Jezqazǵan qalasynyń paıda bolýy osy tulǵanyń arqasynda bolǵan. 1931 jyly Qanysh Sátbaev Jezqazǵan ken ornynyń bas esebin júrgizip, munda mol mys qorynyń bar ekendigin dáleldedi.
Soǵystan keıingi jyldary Jezqazǵanda Keńgir sý qoımasynyń, JEO, shahtalar, karerler, baıytý fabrıkalary, turǵyn úıler, mádenıet, bilim berý mekemeleriniń qarqyndy qurylysy bastaldy. Bul nysandardyń qurylysyn 1944 jyly uıymdastyrylǵan «Qazmedstroı» tresi júrgizdi.
Búgin Jezqazǵanǵa qala statýsynyń berilgenine 68 jyl toldy. 54-shi jyly Úlken Jezqazǵan jumysshy kentine qala mártebesi berilgen. 1973 jyly Jezqazǵan oblysy qurylyp, qala 1997 jylǵa deıin oblys ortalyǵy boldy. Shırek ǵasyrdan keıin Jezqazǵan qaıtadan basty qalaǵa aınaldy. Bul joly Ulytaý oblysynda.
«Búgin bizdiń súıikti qalamyzdyń kúni. Sondyqtan óz atymnan, óz otbasymnyń atynan qalamyzdyń barlyq turǵyndaryna, qonaqtaryna onyń qaıta qurylýy men órkendeýine atsalysqandary úshin alǵys aıtqym keledi. Barshańyzǵa baqyt pen amandyq tileımin», - dedi qala ákimi Qaırat Shaıjanov.
Mereke Jezqazǵannyń jańa ánuranyn oryndaýdan bastaldy. Qala kúnin merekeleý qarsańynda bul týyndy mysty ólke týraly án baıqaýynda úzdik atandy.
Bul kúni qalanyń qoǵamdyq-saıası ómirine belsendi qatysatyn túrli sala sheberleri qurmet gramotalarymen marapattaldy. Sonymen qatar, Jezqazǵanda altyn, laǵyl, injý úılený toılaryn toılaǵan otbasylar sahnaǵa shyǵyp, vals bıledi. Olardyń biri – 50 jyldan astam birge ómir súrip, 4 bala ósirip, 10 nemere, 2 shóbere tárbıelep otyrǵan eńbek ardagerleri Sadyqovtardyń otbasylyq juby.
«Men 48 jyly kelgende munda qala bolǵan joq. 53-shi jyly qala salyna bastady. 1954-shi jyly oǵan qala ataǵy berildi. Sodan beri Jezqazǵan qalasy barǵan saıyn ulǵaıyp keledi», - deıdi Eńbek ardageri Tashman Sadyqov.
Mereke qarsańynda sporttyq is-sharalar uıymdastyryldy. Jezqazǵandyqtar sporttyń 20 túri boıynsha jarysqa qatysty.
Bul kúni qaladaǵy Alǵashqy qurylysshylar alańy naǵyz ortaǵasyrlyq jármeńkege aınaldy. ulttyq aspap, kıim, zergerlik buıymdar, qarý – munyń bári sheberlerdiń qolynan shyqqan. Jalpy alǵanda 20 shatyrda elimizdiń ár óńirinen kelgen sheberler óz týyndylaryn usyndy.
