Jezqazǵandyqtar balalarǵa arnalǵan sporttyq mekemeniń jekege satylýyna narazylyq bildirýde
Jezqazǵan qalasynyń 74-shaǵynaýdanynda ornalasqan «Sporttyq-saýyqtyrý kesheni» JShS-da jattyǵyp júrgen balalardyń ata-analary sport zalyna jınalyp, onyń jekemenshikke ótýine narazylyqtaryn bildirdi. Olardyń aıtýynsha, bul balalar tegin jattyǵa alatyn qaladaǵy jalǵyz nysan.
Facebook áleýmettik jelisinde Berik Jaǵyparov esimdi paıdalanýshynyń jazýynsha, jınalǵan ondaǵan adammen kezdesýge qala ákiminiń orynbasary Zına Aqylbekova kelgen.
«Ata-analar bıýdjettiń qarjysyna salynǵan jáne búginde 700 bala jattyǵyp júrgen sporttyq nysan jekeniń qolyna nelikten satylyp jatqanyn túsine almaı dal. Onyń jańa ıesi barlyǵyn aqyly negizge aýystyrady. Balalar sonda qaıda barady?», - dep jazdy B.Jaǵyparov.
Buǵan jaýap bergen ákim orynbasary qalada kóptegen basqa da sporttyq nysandar, túptep kelgende, saıabaqtar baryn aıtady. Jergilikti sheneýniktiń bul jaýaby jınalǵan jurttyń odan beter ashýyn týdyryp, «qystygúni saıabaqta balany jattyqtyrý múmkin emestigin» aıtyp shýlasty.
Kezdesýden túsirilgen beınejazbada ákim orynbasary Z.Aqylbekova sporttyq nysandy kútip ustaýǵa aı saıyn bıýdjetten 50 mln teńge jumsalatynyn jetkizdi.
«2013 jyly Úkimet qaýlysy shyqqan kezde atalmysh sporttyq mekemeniń dırektory ony jekemenshikke ótkizýge bolmaıtyndyǵyn aıtyp-baqty, biraq qorǵap qala almady. Aqyrynda nysan tizimge endi. Sol kezde biz Úkimetke de, oblys ákimdigine de shyǵyp, sporttyq-saýyqtyrý keshenin jáne jalpy balalarǵa arnalǵan mekemelerdi jekeshelendirýge bolmaıtynyn aıtqan edik. Onyń ústine, 2018-19 jyldarǵy josparǵa balabaqshalardyń jekeshelendirilýi engizilip otyr. Qazir olar boıynsha da jumys istep, balabaqshalardy jekege satýǵa bolmaıtynyn aıtýdamyz. Áıtpegen jaǵdaıda, olardaǵy kezekter sany odan saıyn arta túsetin bolady», - dep atap ótti Z.Aqylbekova.
Jergilikti atqarý organy ókiliniń sózine qaraǵanda, «Sporttyq saýyqtyrý kesheni» JShS-ny satý boıynsha eki aýktsıon ótken. Nysan ekeýinde de satylmaǵan. Al úshinshi saýda-sattyq merzimi áli belgilenbegen.
Aıta keteıik, gosreestr.kz saıtyndaǵy málimet boıynsha, «Jezqazǵan qalalyq Sporttyq-saýyqtyrý kesheni» JShS boıynsha saýda-sattyq 2016 jyldyń 11 qarashasy men 30 jeltoqsanyna belgilengen. Biraq tenderge (konkýrsqa) qatysýshylardyń sany eki adamnan az bolǵandyqtan olar ótpeı qalǵan. Sporttyq nysan 61 633 000,00 teńgege baǵalanýda (24.10.2016 j. jaǵdaı boıynsha). Aýktsıondaǵy bastapqy baǵa - 30 816 500,00 teńge. Mekeme «Jezqazǵan qalalyq dene shynyqtyrý jáne sport bólimi» memlekettik mekemesiniń balansynda tur.
Tender sharty boıynsha nysannyń jańa ıesi onyń profıldik baǵytyn kem degende 10 jyl boıy saqtap turýy kerek. Saýda-sattyqqa shet el azamattary da qatysa alady (zańdy jáne jeke tulǵalar).
