Jezqazǵandaǵy Keńgir sý qoımasynyń jaǵalaýy qoqystan tazartyldy
JEZQAZǴAN. QazAqparat – Jezqazǵanda Keńgir sý qoımasynyń jaǵalaýyn sanıtarlyq tazalaý boıynsha senbilik ótti. Oǵan 350 adam qatysty. Segiz júk kóligimen qoqys shyǵaryldy, dep habarlaıdy QazAqparat tilshisi.
«Osy jyldyń qańtar aıynda Jezqazǵan qalasynyń ákimdigi men kásiporyndary, uıymdary arasynda ózara túsinistik pen yntymaqtastyq týraly Memorandým jasaldy. Memorandýmǵa qol qoıyp, olar jaǵalaýdy sanıtarlyq tazartý men kógaldandyrýǵa aıtarlyqtaı úles qosýǵa daıyn ekendikterin rastady. Bizdiń qazynamyz – Keńgir biregeı sý qoımasyna qamqorlyq kórsetkenderdiń barlyǵyna úlken alǵysymyzdy bildiremiz», – dep habarlady Jezqazǵan ákimdigi.
Senbilik shekteý sharalaryn saqtaı otyryp ótkizildi. Qatysýshylar toptarǵa bólinip, bir-birine jaqyn júrmeýge tyrysty. Olar sondaı-aq maskalar men qolǵaptar týraly umytpady.
«Keńgir jaǵalaýynyń lastanýynyń sebebi – sol jerde demalyp, qoqys tastaıtyn turǵyndardyń jaýapsyzdyǵy. Qurmetti jezqazǵandyqtar, bul bizdiń ortaq ıgiligimiz dep oılańyzdar! Biz óz urpaqtarymyzǵa ne qaldyramyz? Ótinemiz, qoqystaryńyzdy jınap júrińizder!» – dep qala turǵyndaryn eriktiler tazalyqqa shaqyrdy.
