Jezqazǵandaǵy «Qazaqmys» fabrıkasynda jumysshy qaza tapty
QARAǴANDY. QazAqparat - «Qazaqmys» korporatsııasynyń kásiporyndarynyń birinde qaıǵyly oqıǵa boldy, dep habarlaıdy «QazAqparat» HAA tilshisi.
Merdiger uıymnyń jumysshysyn júk vagony qysyp qalǵan. Keıin vagondar ajyratylǵan, biraq jumysshy relste qaza tapqan.
Qaıǵyly oqıǵa «Qazaqmys korporatsııasy» JShS Jezqazǵan baıytý fabrıkasynyń aýmaǵynda bolǵan jáne ol fabrıkadaǵy vıdeobaqylaý kameralaryna túsip qalǵan. 
«19 jeltoqsanda qaıǵyly oqıǵa bolyp, bir adam qaza tapty. Zardap shegýshi «Tranco Zhezkazgan» JShS merdiger uıymynyń jumysshysy. Qaıǵyly oqıǵanyń mán-jaıy anyqtalyp jatyr. Oqıǵany tekserý úshin arnaıy komıssııa quryldy. «Qazaqmys korporatsııasy» JShS eńbek ujymy men basshylyǵy qaza tapqan azamattyń týystary men jaqyndaryna kóńil aıtady», - dep habarlady kompanııanyń baspasóz qyzmeti.
