Jezqazǵandaǵy apattyq jaǵdaıdaǵy úıge qatysty másele sheshimin tapty
ASTANA. QazAqparat - Jezqazǵanda «Jeńis kóshesi, 11» mekenjaıynda ornalasqan apattyq úıge qatysty másele sheshildi. Tótenshe jaǵdaıǵa jol bermeý úshin qala basshylyǵy qajetti sharalardy jasaǵan. Bul maqsatqa qarajat bıýdjetten bólingen, dep habarlaıdy oblystyq ákimdiktiń baspasóz qyzmeti.
Alǵashqy qadam retinde qala ákimi tehnogendik sıpattaǵy obektilik aýqymdaǵy tótenshe jaǵdaı jarııalaý týraly sheshim qabyldady. Sonan soń zańnamaǵa sáıkes jyljymaıtyn múlikti memleket menshigine alý protsedýrasy ótkizildi. Apattyq úıdiń 48 páterindegi turǵyndar ótemaqylaryn aldy. Eki páter jekeshelendirilmegen bolyp shyqty, sondyqtan onyń ornyna basqa baspana berildi.
Turǵyndar máseleniń osylaı sheshilgenine kóńilderi toldy. Olardyń aıtýynsha, ótemaqy somasy jetkilikti.
«Másele sheshildi. Biz jetkilikti ótemaqy alyp, jańa baspana alǵanymyzǵa qýanyshtymyz», - deıdi turǵyndardyń biri Dmıtrıı Naımýshın.
«Barlyǵy sátti sheshilgeni jaqsy boldy. Biz qazir basqa páter izdep jatyrmyz, máselemiz oń sheshilgeni úshin alǵysymyzdy aıtamyz», - deıdi Tańat Baıtórın.
