Jezqazǵandaǵy janarmaı stansasyndaǵy órtti sóndirýge 20-dan astam adam qatysty
ALMATY. KAZINFORM — Jezqazǵan qalasynyń kireberisinde ornalasqan janarmaı quıý stantsııasynda órt shyǵyp, úsh arnaıy kólik janyp ketti, dep habarlaıdy Kazinform agenttiginiń tilshisi.
Órt búgin tańǵy saǵat 8:55–te «S-Munaı» janar jaǵarmaı quıý beketiniń aýmaǵynda paıda boldy. Tańǵy saǵat 9:30–da oqıǵa ornynda eki janar-jaǵar maı jáne bir gaz tasyǵysh kólik janyp ketti.
Kýágerlerdiń aıtýynsha, oqıǵa ornynda jarylys bolǵan.
— Jezqazǵan qalasynda ornalasqan munaı bazalarynyń biriniń aýmaǵynda arnaıy maqsattaǵy 3 avtokólik órttendi. Órt sóndirý bólimsheleri kelgenge deıin gaz-aýa qaspasynyń jarylyp, angardyń qabyrǵalary qırady, - dep habarlady Ulytaý oblysynyń TJD.
Órtke kúrdeliligi joǵary dáreje berildi.
— Sol jerde ornalasqan jedel shtab janarmaıy bar kórshi rezervýardy salqyndatý arqyly qorǵaýǵa arnalǵan esepterdiń birin jiberý týraly strategııalyq sheshim qabyldady. Avtotsısternalardy órt shyqqan jerge jaqyn ornalasqan órt sóndirý gıdranttaryna ornalastyryp, órt sóndirýshiler kóbik shabýylynyń kómegimen 100 sharshy metr alańdaǵy órtti joıdy, - dep tolyqtyrdy oblystyń TJD.
Órt saldarynan munaı bazasynyń 4 qyzmetkeri aýrýhanaǵa jatqyzyldy. Ázirge órttiń shyǵý sebebi anyqtalmaǵan.
Oblys ákiminiń baspasóz qyzmetinen habarlaǵandaı, arnaıy shtab quryldy.
— Jezqazǵan qalasy jol boıyndaǵy «S-Munaı» janar jaǵarmaı quıý beketinde 25.01.2025 jyl saǵat 8:55–te oryn alǵan órtke baılanysty Ulytaý oblysy ákiminiń tapsyrmasymen, oblys ákimi orynbasarynyń tóraǵalyǵymen arnaıy shtab quryldy, - dep túsindirdi oblys ákimdiginde.
Esterińizge sala keteıik, keshe SQO-da órt saldarynan 3 adam qaza tapqan bolatyn.