Jezqazǵandaǵy jańa qus fabrıkasy taýyq jumyrtqasy tapshylyǵyna qatysty máseleni sheshti
JEZQAZǴAN. KAZINFORM – Jezqazǵan qalasynda ashylǵan «Ulytau Kus» qus fabrıkasynyń iske qosylǵanynan beri Ulytaý oblysynda taýyq jumyrtqasynyń tapshylyǵy joıyldy. Bolashaqta óńirdiń qus etine degen qajettiligin jabý kózdelip otyr.
Táýligine 50 myń danaǵa jýyq jumyrtqa. Búgingi tańda mundaı ónimdilik Ulytaý oblysynyń qajettiligin qanaǵattandyryp qana qoımaı, Ulytau Kus ónimderi Qyzylorda oblysy men Túrkistan jáne Shymkent qalalaryna eksporttalady.
Aıta ketý kerek, birneshe jyl buryn Ulytaý oblysynda osy ónimniń tapshylyǵy baıqalǵan. Máseleni jergilikti kásipker Rınat Ahtıamov sheshýge kiristi. Taýyq jumyrtqasyna degen suranysty eskere otyryp, bıznesmen óz qus fabrıkasyn iske qosýdy uıǵarǵan. Ol úshin 1 mln dollar nesıe rásimdegen. Alaıda bul qarajat oǵan tek keńes dáýirinen qalyp qoıǵan, qıraǵan ıesiz qoımalardy qalpyna keltirýge jáne oǵan kommýnıkatsııa tartýǵa ǵana jetken eken.
Jumyrtqa-et baǵytyndaǵy qus fabrıkasyn iske qosý jobasy Ulytaý oblysynyń azyq-túlik qaýipsizdiginiń negizgi elementine aınaldy. Onyń iske qosylýy men damýy aýyl sharýashylyǵyn órkendetýge, kásipkerlerdi qoldaýǵa jáne halyqty sapaly azyq-túlik ónimderimen qamtamasyz etýge eleýli úles qosýdy jalǵastyryp kele jatqan jergilikti qala quraýshy kásiporynnyń qarjylyq qoldaýynyń arqasynda múmkin boldy.
«Atalmysh jobany óz kúshimizben júzege asyrý múmkin bolmas edi. Bul rette «Qazaqmys» korporatsııasynyń zor kómegin atap ótkim keledi. 2023 jyly joba iske asyrylyp, korporatsııanyń qoldaýynyń arqasynda Ulytaý oblysynyń sórelerine ekologııalyq taza jáne sapaly ónim jetkizilip jatyr dep aıtýǵa bolady. Kompanııa óńirdi turaqty azyq-túlik kózimen jáne jańa jumys oryndarymen qamtamasyz ete otyryp, qurylysty aıaqtaýǵa jáne óndiristi iske qosýǵa qarjy bóldi», - dep atap ótti «Ulytau Kus» JK basshysy Rınat Ahtıamov.
Búgingi tańda 50 myń bas taýyqtan kúnine 48 myń jumyrtqa óndiriledi.
«Qazirgi tańda bizde kúnine 47-48 myń jumyrtqa óndiriledi. Bul shamamen 95% ónimdilikti kórsetedi. Munyń bári fabrıkamyzda barlyq protsester avtomattandyrylǵandyqtan jáne ózimiz qurama jem shyǵaratyndyqtan dep oılaımyn. Buǵan deıin bizde mundaı joǵary ónimdilik bolǵan joq. Sońǵy 3-4 aıda kólem ulǵaıdy», - deıdi «Ulytau Kus» JK basshysy Rınat Ahtıamov.
Aıta ketý kerek, «Ulytau Kus» jumyrtqalarynyń sapasy joǵary standarttarǵa saı jáne dıetalyq bolyp sanalady. Qus fabrıkasynyń basshylyǵy jumyrtqalaıtyn taýyqtardy erekshe azyqpen qamtamasyz etý úshin óz jem tsehyn iske qosqan.
Qurama jem tsehy 2500 m2 aýmaqta ornalasqan. Bul jerde jumysshylarǵa arnalǵan sharýashylyq qurylystar, garajdar jáne jem tsehy ornalasqan.
Qustarǵa arnalǵan azyq reseılik jabdyqtarda daıyndalady. Qurama jemge arnalǵan ıngredıentter buryn jergilikti dıqandardan satyp alynatyn, biraq ótken jyldan bastap tseh ıeleri kórshi óńirlerden bıdaı jáne basqa da dándi-daqyldar satyp ala bastady. Jem quramy 14 ıngredıentten turady. Bul quramdy elimizdiń jetekshi zoologtary jumyrtqanyń sapasyn jaqsartý jáne taýyqtardyń jumyrtqalaýyn ulǵaıtý úshin ázirlegen.
Kombıtsehtiń qýattylyǵy saǵatyna 12 tonnany quraıdy. Alaıda, búgingi tańda qus fabrıkasy úshin ónimdiliktiń mundaı kólemi tym joǵary. Biraq jabdyqtar bolashaqta óndiris kólemin ulǵaıtýydy eskere otyryp, satyp alynǵan. Jaqyn arada qus fabrıkasynyń ıeleri soıý tsehyn jáne jergilikti taýyq eti óndirisin iske qospaqshy. Kásipkerdiń jospary boıynsha, qus etin óndiretin tseh jylyna 7300 tonna ónim shyǵarýy tıis.
Aıta keteıik, jumyrtqa baǵasyn turaqtandyrý boıynsha memorandým jasaldy.