Jezqazǵanda jyl sońyna qaraı oblystaǵy alǵashqy bıoelektrostantsııa ashylady
JEZQAZǴAN. QazAqparat - Jezqazǵanda birneshe ınvestıtsııalyq jobany júzege asyrý kózdelip otyr. Onyń ishinde oblystaǵy birinshi bıoelektrostantsııa ashý jospary bar. Aımaqty damytý boıynsha alǵa qoıylǵan josparlar týraly búgin ortalyq kommýnıkatsııalar qyzmetindegi brıfıngte Jezqazǵan qalasynyń ákimi Qaırat Begimov aıtyp berdi, dep habarlaıdy QazAqparat tilshisi.
«2020 jyly biz jalpy ınvestıtsııa kólemi 18,1 mlrd teńgeni quraıtyn jáne 350-den astam jańa jumys ornyn qurýmen 4 jańa jobany iske qosýǵa daıynbyz. Bul qara mys kontsentrattaryn gıdrometallýrgııalyq óńdeýdiń tájirıbelik zaýytyn salý, ónerkásiptik reagentti shyǵarý boıynsha hımııa zaýytyn salý, qurylys materıaldaryn óndirý boıynsha zaýyt salý jáne bıoelektrostantsııa salý sııaqty jobalar. Nátıjesinde 2020 jyldyń qorytyndysy boıynsha negizgi kapıtalǵa salynǵan ınvestıtsııa kólemi 32 mlrd teńgeni quraıdy», - deıdi Qaırat Begimov.
Qala basshysynyń aıtýynsha, bıoelektrostantsııa qurylysyn jyl sońyna deıin aıaqtaý josparlanyp otyr. Bul kásiporyn qatty turmystyq qaldyqtardy kádege jaratady jáne óńdeıdi.
«Bıoelektrostantsııa Keńgir aýylynan eki shaqyrym jerde 4,5 gektar alańda ornalasqan. Ol jasyl tehnologııa Merıolızıs biregeı prıntsıpin jumysta paıdalanady. Qaıta óńdeletin qaldyqtar gazǵa sıntezdelip, odan ári elektr energııasyna aınalady. Jezqazǵan óńirinde bul - «Kaz Green Energy» JShS-men birlesip iske asyrylatyn Slovakııadan kelgen E-Zhasyl «GrupoANKA» kompanııasynyń alǵashqy jobasy. Oǵan salynatyn ınvestıtsııa kólemi - 7-8 mlrd teńge», - dep habarlady Jezqazǵan qalasynyń ákimi.
