Jezqazǵanda joldan ótip bara jatqan 67 jastaǵy keıýanany kólik qaǵyp ketti

JEZQAZǴAN. QazAqparat – Jezqazǵan qalasynyń tanymal pablıginde jaıaý júrginshiler jolynan ótip bara jatqan áıeldi qaqqan jol talǵamaıtyn kólik týraly vıdeo jarııalandy, dep habarlaıdy QazAqparat tilshisi.

Kadrdan qart áıeldiń jaıaý júrginshiler jolymen ótip bara jatqany kórinedi. Qas-qaǵym sátte ony kólik kelip soǵady.

Alǵan soqqydan áıel birneshe metr qashyqtyqqa ushyp ketedi. Júrgizýshi kólikten shyǵyp, jábirlenýshige kómektesýge tyrysady.

Qazir zardap shekken ájeı aýrýhananyń jansaqtaý bóliminde jatyr.

«Naýqas reanımatsııada. Aýyr aralas polıjaraqat, qabyrǵanyń synýy, jambas synýy, keýde jaraqaty tirkelgen. Jaǵdaıy turaqty aýyr», - dep málimdedi Qaraǵandy oblysy densaýlyq saqtaý basqarmasynyń baspasóz qyzmeti.

Júrgizýshiniń jaıaý júrginshini qalaısha baıqamaı qalǵanyn polıtseıler anyqtap jatyr.

«Nissan Patrol kóligin 50 jastaǵy júrgizýshi basqarǵan. Ol Seıfýllın kóshesimen Abaı kóshesi jaǵynan Amanjolov kóshesine qaraı kele jatyp, 67 jastaǵy jaıaý júrginshini qaǵyp ketken. Jol-kólik oqıǵasy saldarynan túrli jaraqat alǵan áıel medıtsınalyq mekemege jetkizildi. Derek tirkelip, tıisti saraptamalar taǵaıyndaldy, onyń nátıjesi boıynsha protsessýaldyq sheshim qabyldanady», - dep habarlady Qaraǵandy oblysy PD baspasóz qyzmetinde.