Jezqazǵanda jer asty sý kózderine kóshý josparlanyp otyr
Jezqazǵandyqtar úshin anaǵurlym mańyzdy máselelerdiń biri sýmen qamtamasyz etý.
2017 jyldan bastap munda ekinshi jáne úshinshi kezektegi júıelerdi qaıta qurý jumystary júrgizilýde. Osylaısha, qaladaǵy barlyq sý qubyry júıeleriniń jartysynan astamy retke keltiriledi, bul olardyń jalpy tozýyn 70%-dan 30%-ǵa deıin azaıtady.
Degenmen, qala turǵyndarynyń úılerine beriletin sýdyń sapasyna qatysty másele ashyq kúıinde qalyp otyr. Bul problemany sheshý úshin óńir basshysy jer asty sý kózderine kóshýdi tapsyrdy.
«Bul kóshýdi júzege asyrý jáne respýblıkalyq bıýdjetten qarjylandyrýdy suratý úshin bizge rezervýar men sorǵy stantsııasyn salý qajet. Aldaǵy jyldary qaladaǵy aýyz sýdyń sapasyn jaqsartý úshin osy máselelermen tyǵyz aınalysýdy tapsyramyn», - dedi ol.
Oblys ákimi sondaı-aq qalada joldar jáne jylýmen qamtamasyz etý júıesi belsendi jóndeýden ótkizilip jatqanyn, halyqtyń áleýmettik osal toptaryna jalǵa beriletin jáne nesıelik turǵyn úıler salynatynyn atap ótti. Sonymen qatar, aımaq basshysynyń aıtýynsha, Jezqazǵanda kóshi-qonnyń teris saldosy toqtatyldy.
«Buǵan qaramastan, adamdardyń qaladan kóship ketýi sebepterine taldaý jasap, olarmen jumys isteý qajet. Birinshi kezekte, meniń oıymsha, bul jumys oryndary men áleýmettik kepildikter máselesi», - dep atap ótti ol.
Jezqazǵan qalasynyń ákimi Qaırat Begimovtyń aıtýynsha, qalada shaǵyn jáne orta bıznes qarqyndy damyp keledi. Jalpy kólemde kásipkerlerden bıýdjetke túsetin túsimderdiń úlesi 37%-dan astam kórsetkishti quraıdy. Qalada jalpy somasy 13 mlrd teńgeden astam 25 bıznes-joba iske asyrylýda, sondaı-aq «Qazaqmys» korporatsııasynyń jańa zaýytynyń qurylysy jáne qus fabrıkasyn qurý jobasy maquldandy. Jaqyn arada Jezqazǵanda, arzan baǵamen taýarlar satylatyn «Uly dala» on sýpermarketter jelisi ashylady.
Qala ákimi sondaı-aq áleýmettik qoldaý boıynsha qabyldanǵan sharalar týraly baıandady. Bıylǵy jyly Jezqazǵanda segiz adam «Eńbek» baǵdarlamasy boıynsha óz isin ashýǵa shaǵyn nesıe aldy. Taǵy 1140 jumyssyz turaqty jumys ornyn tapty. Kóp balaly otbasylardyń 529 balasy qalalyq qoǵamdyq kólikte tegin júrý quqyǵyna ıe boldy. Mektepterde 1200 oqýshy ystyq tamaqty tegin alady. 17 mektepte uzartylǵan kúnniń tegin toptary ashyldy.
Jezqazǵan qalasynyń damýy men abattandyrylýyna qatysty da belsendi sharalar qolǵa alynýda. Bıyl 15,6 km qalaishilik joldar men 8 aýlany jóndeý josparlanýda. Sonymen qatar, qalada dene shynyqtyrý-saýyqtyrý kesheniniń qurylysy bastaldy.
