Jezqazǵanda jas dárigerlerge páter berildi
NUR-SULTAN. QazAqparat - Jezqazǵanda dárigerler tapshylyǵy máselesi olarǵa vedomstvolyq turǵyn úı berý arqyly sátti sheshilýde. Keshe taǵy segiz jas dáriger qonys toıyn toılady. Qaraǵandy oblysynyń ákimi Jeńis Qasymbek mamandarǵa páter kiltin tabys etti, dep habarlaıdy oblystyq ákimdiktiń baspasóz qyzmeti.
«Medıtsına ýnıversıtetin bitirgennen keıin men ózimniń týǵan jerim Jezqazǵanǵa oraldym. Qalalyq aýrýhanada jumys isteı bastadym. Buryn kúıeýim ekeýimiz páter jaldap turdyq, al endi bizde óz baspanamyz bar. Bul vedomstvolyq páter bolsa da, báribiz bizdiń úıimiz dep sanaımyz. Jas mamandarǵa osyndaı qoldaý kórsetilip jatqany úshin kóp rahmet», - dep oıyn bildirdi Jezqazǵan qalalyq aýrýhanasynyń jalpy tájirıbe dárigeri Áıgerim Mamına.
Jańa qonys ıelerin Qaraǵandy oblysynyń ákimi quttyqtady. Ol óńirde dárigerlerdiń ómir súrý sapasyn jaqsartý dástúrge aınalǵanyn atap ótti.
«Sizderdiń jumystaryńyz óte kúrdeli jáne mańyzdy. Kúndiz-túni dárigerler júzdegen adamnyń ómirin qutqarady. Sondyqtan da biz óz tarapymyzdan páter máselesin sheshýde kómek kórsetýdi jalǵastyramyz», - dedi Jeńis Qasymbek.
Ol óńirde 300-ge jýyq dáriger osy jyly qyzmettik baspana alady dep atap ótti. Atap aıtqanda, Jezqazǵanda kópqabatty úılerdiń birinde páter satyp alý jáne jóndeý jumystary josparlanǵan. Kúzge qaraı taǵy 50 dáriger qonys toıyn atap ótedi.
Jumys sapary barysynda ákim Jezqazǵan qalalyq aýrýhana men medıtsınalyq kolledjinde boldy.
Aýrýhana qalashyǵy Jezqazǵan qalasynyń áleýmettik-ekonomıkalyq damýynyń keshendi jospary aıasynda qalpyna keltirildi. Bul aýqymdy joba úsh jyl buryn bastaldy. Bıyl qaıta qurý tolyǵymen aıaqtaldy.
«Uzaq jyldar boıy bul nysan bos boldy. Aýrýhana qalashyǵyn qaıta qurý medıtsınalyq mekemelerde alań jetispeý máselesin sheshýge kómektesti», - deıdi Densaýlyq saqtaý basqarmasynyń basshysy Erjan Nurlybaev.
Endi munda jańa keńes berý-dıagnostıkalyq ortalyq, emhana, narkologııa, JITS ortalyǵy, týberkýlezge qarsy balalar shıpajaıy ornalasqan. Aýrýhana qalashyǵyndaǵy barlyq ǵımarattar jóndeýden ótti. Ondaǵy ınjenerlik kommýnıkatsııalar tolyǵymen aýystyryldy. Sondaı-aq, aýmaq retke keltirilip, abattandyryldy.
Qazir emhanaǵa 20 myńǵa jýyq adam tirkelgen. Keńes berý-dıagnostıkalyq ortalyq kúnine 250 patsıentti qabyldaıdy. Ońtústikkoreıalyq óndiristiń jańa joǵary tehnologııalyq jabdyqtary satyp alyndy. Dárigerlerdiń aıtýynsha, jumys isteý ońaı, yńǵaıly jáne jyldam bola tústi.
Aýrýhana qalashyǵynda sondaı-aq Jezqazǵan medıtsınalyq kolledji ornalasqan. Onda Jeńis Qasymbek medbıkelerdi, akýsherlerdi, feldsherler men laboranttardy daıarlaýdaǵy jańa ádistermen tanysty. Bul jerde dýaldy bilim berý elementteri qoldanylady. Stýdentter tórt mamandyq boıynsha oqıdy: «Emdeý isi», «Meıirbıke isi», «Stomatologııa» jáne «zerthanalyq dıagnostıka».
«2017-2018 oqý jylynda biz 88,3 mln. teńgege zamanaýı sımýlıatsııalyq jabdyqtar satyp aldyq. Interaktıvti oqý jabdyqtary ornatyldy. Ótken jyldyń qańtar aıynda «Stomatologııa» mamandyǵy boıynsha kolledjdiń ózindik klınıkalyq bazasy ashyldy. Onda stýdentter dýaldi oqytý aıasynda praktıkalyq daǵdylardy jetildirýde», - dedi kolledj dırektory Merýert Moldına.
Kolledjde 571 stýdent oqıdy, onyń ishinde 378-i memlekettik tapsyrys boıynsha bilim alady.
