Jezqazǵanda Janat Hadjıev atyndaǵy aımaqtyq teatrlar festıvaliniń laýreattary marapattaldy
QARAǴANDY. QazAqparat - Jezqazǵanda Janat Hadjıev atyndaǵy І aımaqtyq teatrlar festıvali aıaqtaldy. Festıvaldiń jabylý saltanatynda laýreattardyń esimderi atalyp, júldeler tabys etildi, dep habarlaıdy Qaraǵandy oblysy ákimdiginiń resmı saıty.
«Úmit» nomınatsııasynda Arqalyq qalasynyń balalar jáne jasóspirimder teatry jeńimpaz atandy. «Kórermender kózaıymy» syılyǵy S.Seıfýllın atyndaǵy Qaraǵandy Memlekettik qazaq teatryna berildi.
«Úzdik epızodtyq ról» júldesi S.Seıfýllın atyndaǵy teatrdyń ártisi Meıirbek Shákenovke tabys etildi. «Úzdik áıel róli» nomınatsııasynda K.Stanıslavskıı atyndaǵy Qaraǵandy drama teatrynyń ártisi Marına Marycheva jeńimpaz atandy. «Úzdik er adam róli» nomınatsııasynda J.Aımaýytov atyndaǵy Pavlodar qazaq drama teatrynyń akteri Bekbolat Oqasov jáne S.Qojamqulov atyndaǵy Jezqazǵan qazaq mýzykalyq-drama teatrynyń ártisi Temirjan Janbotaev úzdik dep tabyldy.
«Úzdik rejısserlik jumys» úshin syılyq Q. Qýanyshbaev atyndaǵy Astana qazaq drama teatrynyń rejısseri Nurlan Jumanııazovqa tabystaldy. «Oblys ákiminiń syılyǵy» Ǵ. Músirepov atyndaǵy Almaty memlekettik Akademııalyq balalar jáne jasóspirimder teatryna berildi.
«Janat Hadjıev atyndaǵy syılyqty» qazylar alqasy S.Qojamqulov atyndaǵy Jezqazǵan qazaq mýzykalyq-drama teatryna tabys etti.
Janat Hadjıev atyndaǵy birinshi aımaqtyq teatrlar festıvali Jezqazǵan qalasynda 8-12 qarasha aralyǵynda ótti. Shara S.Qojamqulov atyndaǵy Jezqazǵan qazaq mýzykalyq-drama teatrynyń 45 jyldyq mereıtoıyna oraılastyrylǵan edi.
Festıvaldiń qazylar alqasynyń tóraǵasy KSRO jáne QazSSR halyq ártisi, Qazaqstannyń eńbek sińirgen ártisi Asanáli Áshimov boldy.
