Jezqazǵanda jańa meshit pen mektep ashylady
QARAǴANDY. QazAqparat - Búgingi tańda Jezqazǵanda jańa meshit pen mektep salynyp jatyr. Daıyn nysandardy kelesi jyly tapsyrý josparlanýda. Qaraǵandy oblysynyń ákimi Erlan Qoshanov qurylys alańdarynda bolyp, jumystardy óz kózimen kórip qaıtty, dep habarlaıdy QazAqparat tilshisi.
Nysan 2019 jyly aqpan aıynda «Aq-Meshit» qoǵamdyq qorynyń bastamasymen salyna bastaǵan. Qazir bolashaq ǵımarattyń irgetasy quıylýda.
Qalaǵa jańa meshit qajet, sebebi eski ǵımaratqa nıet bildirýshi jamaǵat syımaı jatady. Sondaı-aq ol qalanyń shetinde ornalasqan jáne tek 500 adamǵa eseptelgen. Joba boıynsha jańa ǵımaratta 1500 adam ornalasady. Alla úıiniń jalpy aýdany 2,916 sharshy metrdi quraıdy.
«Qazir bizde irgetas quıý júrip jatyr. Barlyq jumystar merziminde júrgiziledi. Kadrlar tapshylyǵy joq. Osy kezeńde qajetti barlyq qurylys materıaldary satyp alyndy. Jumysty ýaqytynda aıaqtaýdy josparlap otyrmyz», - dedi «Aq-Meshit» qoǵamdyq qorynyń tóraǵasy Marat Bekmaǵambetov.
Sondaı-aq Jezqazǵanda jańa mektep-ınternattyń da qurylysy belgilengen merzimine saı júrgizilip jatyr. Qurylysshylar qabyrǵalardy jartylaı turǵyzyp úlgergen. Ǵımarat 900 oqýshyǵa eseptelgen. Bul jerde Jezqazǵan, Ulytaý jáne Sátbaevtyń balalary bilim alatyn bolady.
Óńir basshysy merdigerlerge ǵımarat 2020 jyldyń qyrkúıek aıyna deıin daıyn bolýy úshin barynsha kúsh salýdy tapsyrdy. Buıyrtsa, kelesi oqý jylyn balalar jańa mektepte bastaıdy.
