Jezqazǵanda zamanaýı, modýldi juqpaly aýrýlar gospıtali salyndy

Ǵımaratta qurylysshylardan keıin palatalardy retke keltirý jumystary qaldy. Qazirgi tańda gospıtal aýmaǵy abattandyrylyp jatyr. Aýrýhanany qazan aıynyń sońynda tapsyrý josparlanǵan, dep habarlaıly QazAqparat tilshisi.

Qaraǵandy oblysynyń ákimi Jeńis Qasymbek Jezqazǵan óńirine jumys sapary barysynda jańa gospıtaldi aralap kórdi.

«Eshqandaı problema joq. Belgilengen merzim saı jumys istep jatyrmyz. 15 qazanǵa deıin negizgi bóligin aıaqtap, iske qosýdy josparlap otyrmyz. Barlyq bloktardy aıaqtaımyz, kereýetterdi qoıdyq», - dep baıandady qurylys kompanııasynyń ókili Áset Ibraev.

Aýrýhana ınfektsııalyq baqylaýdyń barlyq standarttaryna sáıkes keledi. Ol dıagnostıka men emdeýge arnalǵan jańa medıtsınalyq jabdyqtarmen: kompıýterlik tomografpen, sandyq rentgen apparatymen, medıtsınalyq gaz júıesimen, ÝDZ, EKG, ÓJJ jáne taǵy basqa qurylǵylarmen jabdyqtalady.

Emdeý bokstarynyń bólek kireberisteri bolady. Ár boksty maksımaldy oqshaýlaý sharasy qarastyrylǵan. Onda arnaıy chıpterdiń kómegimen ǵana kiredi.

Aýrýhanada joǵary qaýipsizdik klasy bar «aqyldy» jeldetý júıesi ornatylǵan. Palatalardańy árbir kereýette medbıkeni shaqyrý túımesi bar.

Jeńis Qasymbekti kadr máselesi qyzyqtyrdy, dálirek aıtar bolsaq, ákim jańa gospıtalda kimder jumys isteıtinin surady.

Densaýlyq saqtaý basqarmasynyń basshysy Erjan Nurlybaevtyń aıtýynsha, mamandar sany boıynsha esep júrgizilgen. 204 qyzmetker qajet, onyń ishinde 50 dáriger, 82 orta medıtsınalyq personal. Modýldik juqpaly aýrýlar aýrýhanasynda koronavırýs ınfektsııasynyń alǵashqy tolqynynda jumys istegen jergilikti mamandar jumys isteıtin bolady. Emdeý mekemesiniń jumysyn kúsheıtý úshin Qaraǵandydan 23 dáriger jiberý josparlanýda.

«Jaz mezgilinde koronavırýsqa qatysty jaǵdaı Jezqazǵan aımaǵy úshin ońaı bolǵan joq, sondyqtan qazir munda erekshe nazar aýdarylýda. 200 tósektik zamanaýı modýldi aýrýhana ashylady. Qosymsha eki kompıýterlik tomograf, rentgen apparattary, jedel járdem mashınalary jetkiziledi», - dedi Jeńis Qasymbek.

Oblys ákiminiń aıtýynsha, «Qazaqmys» korporatsııasynyń qoldaýymen Jezqazǵanda jas mamandarǵa 22 páter beriledi. Óńirde densaýlyq saqtaý basqarmasynyń aımaqtyq ókildigi quryldy.