Jezqazǵanda zamanaýı dene shynyqtyrý-saýyqtyrý kesheni ashyldy
ASTANA. KAZINFORM - Bes blok jáne sportpen shuǵyldanýǵa arnalǵan 8 myńǵa jýyq sharshy metr aýmaq. Búgin Jezqazǵanda «Jiger» zamanaýı dene shynyqtyrý-saýyqtyrý kesheniniń ashylýy ótti, dep habarlaıdy Kazinform agenttiginiń tilshisi.
«Qazaqmys» kompanııasynyń áleýmettik jaýapkershiliginiń arqasynda endi Jezqazǵannyń jas turǵyndary sporttyq belesterdi baǵyndyra alady. Jańa kópfýnktsıonaldy sport kesheni qala jastarynyń súıikti ornyna aınalary haq deıdi Ulytaý oblysynyń ákimi Dastan Ryspekov. Óziniń quttyqtaý sózinde óńir basshysy barlyq jezqazǵandyqtardyń atynan sheksiz qýanyshyn bildirdi.
- Búgin sizder «Qazaqmys» korporatsııasynyń qoldaýymen salynǵan «Jiger» sport kesheniniń ashylýyna kýá bolyp otyrsyzdar. Bul keshende sportpen shuǵyldanýǵa, sondaı-aq halyqaralyq jáne respýblıkalyq jarystar ótkizýge qajettiniń barlyǵy qarastyrylǵan. Keshenniń ashylýy halyq arasynda buqaralyq sportty dáripteýge jáne balalar men jasóspirimderdi dene shynyqtyrýmen jáne sportpen shuǵyldanýǵa barynsha kóbirek tartýǵa múmkindik beretinine senimdimin. Osy keshenniń tárbıelenýshileri taıaý bolashaqta sporttyq belesterdi baǵyndyryp, álemdik arenalarda kókbaıraǵymyzdy jelbiretip, bizdiń oblysymyzdy jáne elimizdiń ataǵyn shyǵarady dep senemiz, - dedi oblys ákimi Dastan Ryspekov.
Qurylys jobasy Bank RBK qoldaýymen «Qazaqmys korporatsııasy» JShS men Ulytaý oblysynyń ákimdigi arasyndaǵy memorandýmdy oryndaý sheńberinde iske asyryldy. Sport nysanyn salýǵa 8,5 mlrd teńge bólindi.
- Qańtar aıynyń basynda Sátpaevta «Aqbota» úlken balabaqshasy ashyldy, odan keıin elimizdegi eń iri shahmat akademııasy esigin ashty, búgin mine «Jiger» DSK ashyldy. Alda bizdi áli de kóptegen jańalyqtar kútýde. Jyl sońyna deıin taǵy 5-6 nysannyń qurylysyn aıaqtap úlgeremiz. Barshamyzǵa úlken jeńister tileımin. Bizdiń oblysymyz órkendep, damı bersin, al óńirimizdiń turǵyndary úlken jeńisterge qol jetkizip, oblysymyzdyń dańqyn asqaqtata bersin, - dep atap ótti «Qazaqmys Korporatsııasy» JShS basqarma tóraǵasy Nurahmet Nýrıev.
Keshenniń jalpy aýdany 7 816 m². Ǵımarattyń úsh qabatynda bes fýnktsıonaldy blok ornalasqan: ústel tennısi, boks, gımnastıka zaldary, jattyǵý zaly jáne basseın. Sońǵysy Jezqazǵan turǵyndaryn erekshe qýantty deýge bolady. Sebebi qalada osyǵan deıin basseın bolmaǵan. Jańa júzý basseıniniń uzyndyǵy 25 metrdi quraıdy jáne ol barlyq standarttarǵa sáıkes jabdyqtalǵan. Oǵan keshenniń ashylýyna arnaıy qonaq retinde kelgen júzý sportynan Olımpıada chempıony Dmıtrıı Balandın oń baǵasyn berdi.
- Ulytaý oblysynyń basshylyǵy men Qazaqmys korporatsııasyna osy sport keshenin ashqany úshin alǵys aıtamyn. Men ózim qazir ulttyq quramanyń jattyqtyrýshysy bolyp jumys isteımin jáne bizdiń komandada elimizdiń barlyq oblystarynan kelgen sportyshlar bar. Alaıda, ókinishke oraı, Ulytaý oblysynan ázirge ókilder joq. Biraq bolashaqta sizder ulttyq quramaǵa kirip, Qazaqstandy halyqaralyq arenada tanytasyzdar dep úmittenemin. Men árbir balanyń talantty ekenine senemin, olardyń áleýetin ashý úshin jaǵdaı jasaý óte mańyzdy, - dep óz áserimen bólisti Olımpıada chempıony Dmıtrıı Balandın.
Keshende komandalyq sport túrlerine arnalǵan aýdany 1200 m² quraıtyn ámbebap sport zaly qarastyrylǵan, ol elektrondy tablomen, basketbol saqınalarymen, sporttyq múkámmalmen jáne 320 oryndyq trıbýnalarmen jabdyqtalǵan. Aýdany 350 m² kórkem jáne sporttyq gımnastıka zalynda aınalar ornatylyp, sporttyq tósenishtermen, arqandarmen jáne gımnastıkalyq snarıadtarmen jabdyqtalǵan. Sport kesheniniń ekinshi qabatynda álemdik standarttarǵa sáıkes keletin ústel tennısine arnalǵan zal jáne kásibı rıngi, tuoyp, shved qabyrǵalary jáne daıyndyqqa arnalǵan trenajerlary bar boks zaly ornalasqan. Bul jerde Olımpıada chempıony Ermahan Ybraıymov jas sportshylarǵa shaǵyn sheberlik sabaǵyn ótkizdi.
- Ulytaý oblysynda sportpen aınalysýǵa tamasha múmkindik týdy. Óńir basshylyǵy men «Qazaqmys» korporatsııasy jezqazǵandyqtarǵa osy múmkindikti syılaǵanyna óte qýanyshtymyn. Men taıaý bolashaqta álemdik arenada Ulytaý oblysynan shyqqan boksshylaryn kóretinimizge kámil senimdimin, - dedi Olımpıada chempıony Ermahan Ybraıymov.
Jańa sport nysanynyń qurylysymen «Tansu Construction» kompanııasy aınalysty. Jańa ǵımarat az ýaqytta boı kóterdi.
«Jiger» DSK Qazaqstannyń eń zamanaýı sport keshenderiniń biri bolyp tabylady. «Qazaqmys» korporatsııasy nysannyń ashylýy Ulytaý oblysynyń jan-jaqty damýyna, onyń turǵyndarynyń ómir súrý sapasyn arttyrýǵa, jastar men aǵa býynnyń sportpen shuǵyldanýǵa jáne densaýlyǵyn nyǵaıtýǵa qýatty serpin beretinine senimdi.