Jezqazǵanda «Úzdik kıiz úı» baıqaýy ótip, jeńimpazdar aqshalaı syılyqtarǵa ıe boldy
JEZQAZǴAN. KAZINFORM – Búgin Ulystyń uly kúni – áz Naýryz merekesine oraı Ulytaý oblysynyń qala-aýdandarynda aýqymdy ári mazmundy is-sharalar uıymdastyryldy. Óńir boıynsha barlyǵy 130 kıiz úı tigilip, merekelik dýmanǵa 100 myńnan astam turǵyn men qonaq jınaldy.
Aımaq basshysy Dastan Ryspekov oblys ortalyǵy – Jezqazǵan qalasyndaǵy Naýryz merekesine qatysyp, óńir jurtshylyǵyn ulyq merekemen quttyqtady. Oblys ortalyǵynda 30-ǵa jýyq kıiz úı boı kóterip, olardyń arasynda «Úzdik kıiz úı» baıqaýy uıymdastyryldy. Jeńimpazdar qomaqty aqshalaı syılyqtarmen marapattalyp, barlyq qatysýshylarǵa yntalandyrý sertıfıkattary tabystaldy. Jezqazǵannyń ózinde 40 myńnan astam adam merekelik sharalardy tamashalady.
Mereke barysynda jınalǵan qaýymǵa Naýryz kóje usynylyp, ulttyq taǵamdar men sýsyndardan dám tatqandar erekshe kóńil kúıge bólendi.
Sonymen qatar mekemeler men kásiporyndar arasynda ulttyq salt-dástúrlerdi dáripteıtin saıystar uıymdastyrylyp, kópshilikke rýhanı taǵylym syılady.
Etnoaýyl aýmaǵynda zamanaýı tehnologııalar da kórinis tapty. Atap aıtqanda, jasandy ıntellekt negizinde ázirlengen Digital Nauryz robot ekspozıtsııalary kelýshilerdiń qyzyǵýshylyǵyn arttyryp, merekege erekshe reńk berdi.
Merekelik sharalar aıasynda kelýshilerge Taıjan Qalmaǵambetov atyndaǵy oblystyq fılarmonııa ónerpazdary men Qazaqstan estradasynyń tanymal juldyzdarynyń kontserttik baǵdarlamasy usynyldy.