Jezqazǵanda úsh iri ınvestıtsııalyq joba júzege asyrylmaq
JEZQAZǴAN. QazAqparat – Jezqazǵanda bıyl temir mys kontsentrattaryn óńdeıtin gıdrometallýrgııalyq zaýytty iske qosý kózdelip otyr. Ónerkásiptik reagentter óndirisi boıynsha hımııalyq zaýyt qurylysyn aıaqtaý josparlanýda. Sondaı-aq, bıoelektrostantsııa salý jumystary bastalady. Joba boıynsha QTQ, qoqys jınaý, olardy tasymaldaý, qaıta óńdeý jáne tolyq kádege jaratý kózdeledi, dep habarlaıdy QazAqparat tilshisi.
Jezqazǵan ákimi Qaırat Ábsattarov Óńirlik kommýnıkatsııalar qyzmeti platformasynda ótken onlaın-brıfıngte qalanyń damý josparlary týraly aıtyp berdi.
«2022 jyly alty kópqabatty turǵyn úıdiń qurylysy aıaqtalady. 224 otbasyn turǵyn úımen qamtamasyz etemiz, al turǵyn úıge kezek 9,3%-ǵa qysqartylatyn bolady. Jalpy qalanyń sáýlettik kelbetin jaqsartýǵa baǵyttalǵan «Qalanyń biryńǵaı sáýlettik stılin – dızaın kodyn ázirleý« jańa jobasyn iske asyrý bastalady», – dedi Qaırat Ábsattarov.
Bıyl perzenthanaǵa jáne kópsalaly aýrýhananyń qasbetine kúrdeli jóndeý júrgizý, aýmaqty, sondaı-aq balalar úıin abattandyrý josparlanýda. 45 tósektik onkologııalyq ortalyq ashylady.
Qala ákimdigi turǵyn úı qoryn jańartý baǵdarlamasyn qabyldady. 2025 jylǵa deıin 137 apatty jáne eski úıler qonys aýdarýǵa jatqyzylady. 2022 jyldyń josparyna 21 úı kiredi.
Qoǵamdyq kólikke erekshe nazar aýdarylatyn bolady. Avtobýs parkin jańartý josparlanýda. Qaladaǵy aıaldamalarda tegin Wi-Fi ornatylady, bul elektrondyq bıletterdi engizýdi jeńildetedi.
Qaırat Ábsattarovtyń aıtýynsha, osy jyldyń mamyr aıynda Esqula sý qubyrynyń qurylysy aıaqtalady. Sonymen qatar, uzyndyǵy 56 km Úıtas-Aıdos sý qubyryn kúrdeli jóndeý bastalady.
