Ulytaý oblysynda 2029 jylǵa deıin 58 ınvestıtsııalyq jobany júzege asyrý kózdelip otyr
ASTANA.KAZINFORM - Premer-mınıstrdiń birinshi orynbasary Nurlybek Nálibaevtyń tóraǵalyǵymen Memleket basshysynyń Ulytaý oblysyn keshendi damytý jónindegi tapsyrmalaryn júzege asyrý aıasynda ortalyq memlekettik organdardyń, ulttyq kompanııalardyń, iri bıznes ókilderiniń jáne Ulytaý oblysy ákimdiginiń qatysýymen óńirdiń áleýmettik-ekonomıkalyq damýy men basym ınvestıtsııalyq jobalardy júzege asyrý máseleleri boıynsha keńes ótti.
Úkimettiń baspasóz qyzmetiniń habarlaýynsha, Keńeste óńirdiń ornyqty damýy, halyqtyń ómir súrý sapasyn arttyrý, ınjenerlik jáne áleýmettik ınfraqurylymdy jańǵyrtý, sondaı-aq Jezqazǵan qalasynyń bas josparyn júzege asyrý máseleleri qaraldy.
Jezqazǵanda Kongress ortalyǵyn, ýnıversıtetti, ınklıýzıvti sport ortalyǵyn jáne áleýmettik qyzmet kórsetý ortalyǵyn salý, sondaı-aq sport, bilim berý, mádenıet nysandary men ınjenerlik ınfraqurylym jobalaryn júzege asyrý barysy talqylandy.
Sonymen qatar 2026-2029 jyldarǵa arnalǵan 58 bıýdjettik ınvestıtsııalyq jobadan turatyn óńirlik jobalar pýly qaralyp, olardyń ınjenerlik, áleýmettik jáne jol-kólik ınfraqurylymyn damytýǵa, turǵyn úı qurylysyna jáne óńirdiń ınvestıtsııalyq tartymdylyǵyn arttyrýǵa baǵyttalǵany aıtyldy.
Nurlybek Nálibaev Memleket basshysynyń tapsyrmalaryn sapaly ári ýaqtyly oryndaýdyń mańyzyn atap ótip, jobalardy qarjylandyrý men jobalyq qujattamany jedel ázirleýdi tapsyrdy.
Keńes qorytyndysy boıynsha jaýapty memlekettik organdarǵa, ulttyq kompanııalarǵa, iri bıznes ókilderi men oblys ákimdigine ınvestıtsııalyq jobalardy ýaqtyly júzege asyrý jáne olardyń oryndalýyn turaqty baqylaýda ustaý jóninde naqty tapsyrmalar berildi.
Aıta keteıik, osyǵan deıin Memleket basshysy Ulytaý oblysynyń jańa ákimine Memleket basshysy oblystyń ornyqty damýyn qamtamasyz etýge, óńirdiń ınvestıtsııalyq tartymdylyǵyn arttyrýǵa jáne azamattardyń turmys sapasyn jaqsartýǵa baǵyttalǵan birqatar tapsyrma berdi.
