Jezqazǵanda Ulytaý tehnıkalyq ýnıversıteti ashylady

ASTANA. QazAqparat – Ulytaý tehnıkalyq ýnıversıtetin qurý týraly Úkimet qaýlysynyń jobasy kópshilik talqylaýǵa shyqty, dep habarlaıdy QazAqparat tilshisi.

«Ulytaý tehnıkalyq ýnıversıteti sharýashylyq júrgizý quqyǵyndaǵy respýblıkalyq memlekettik kásiporny qurylsyn. Kásiporynǵa qatysty memlekettik basqarýdyń tıisti salasyna basshylyq jasaý jónindegi ýákiletti organ bolyp Ǵylym jáne joǵary bilim mınıstrligi belgilensin. Onyń qyzmetiniń negizgi máni - tehnıkalyq jáne kásiptik, orta bilimnen keıingi, joǵary, joǵary oqý ornynan keıingi jáne qosymsha bilim berý salasynda bilim berý bolyp aıqyndalsyn», - delingen «Ashyq» NQA portalynda jarııalanǵan qujatta.

Úkimet qaýlysy 4 mamyrǵa deıin kópshilik talqylaýda bolady.

Eske salaıyq, Memleket basshysy byltyr Ulytaý oblysyna sapary barysynda Jezqazǵanda memlekettik tehnıkalyq ýnıversıtet ashý máselesin qarastyrý jóninde tapsyrma bergen edi.