Jezqazǵanda tekserilmegen qurylǵylardy paıdalanǵan aýrýhana dırektoryna aıyppul salyndy

JEZQAZǴAN. QazAqparat – Jezqazǵan qalasynyń kópsalaly aýrýhanasynyń dırektory tekserilmegen ólsheý qurylǵylaryn paıdalanýǵa jol bergen. Bul týraly Saýda jáne ıntegratsııa mınıstrliginiń baspasóz qyzmetinen málim etti, dep habarlaıdy QazAqparat tilshisi.

«Tehnıkalyq retteý jáne metrologııa komıtetiniń Qaraǵandy oblysy boıynsha departamenti Jezqazǵan qalasynyń kópsalaly aýrýhanasy dırektoryna qatysty tekseris júrgizdi. Nátıjesinde laýazymdy tulǵa tekserilmegen 279 ólshem qurylǵysyn qoldanýǵa jol bergen. Atap aıtqanda, ol qandaǵy otteginiń satýratsııasyn ólsheıtin 170 pýlsoksımetr, aýyr jaǵdaıdaǵy naýqastardyń densaýlyq parametrlerin baqylaıtyn 16 monıtordy paıdalaný úshin ruqsat etken. Sondaı-aq, aýrýhana 27 ınvazııalyq shprıts sorǵylaryn qoldanǵan», - dep málimdedi vedomstvonyń baspasóz qyzmetinen.

Quzyrly organ dereginshe, sot úkimimen aýrýhana basshysyna 493 143 teńge kóleminde aıyppul salynǵan.