Jezqazǵanda tapshylyqty joıý úshin 900 tonna janarmaı jetkiziledi
QARAǴANDY. QazAqparat - Jezqazǵandaǵy janar-jaǵarmaı tapshylyǵyn joıý maqsatynda 900 tonna janarmaı jetkiziledi, dep habarlaıdy «QazAqparat» HAA tilshisi.
Qaraǵandy oblystyq ákimdiginiń baspasóz qyzmeti bergen málimetterge qaraǵanda, jaǵdaıdy retteý úshin qandaı sharalar qoldanylatyny sheshilgen. Oblys ákiminiń orynbasary Almas Aıdarovtyń aıtýynsha, Jezqazǵandaǵy benzın tapshylyǵyna Atyraý munaı óńdeý zaýytynyń jóndeý jumystarynan keıin tolyq qýatpen jumys istemeýi sebep bolǵan. «Benzın tasymaly keshigip jatyr. Pavlodardaǵy zaýyt 20 qyrkúıekte jóndeýge jabyldy. Dál qazir AI-92 markaly 350 tonna benzın jolda kele jatyr, - dedi ol. Benzın tıelgen quram qazir Aqtóbe oblysynda. Ol búgin túnge deıin jetýi tıis. Atyraý munaı óńdeý zaýytynan taǵy da 550 tonna janarmaıdy jeke fırma jetkizedi. Bul qor benzın tapshylyǵyn 20 kúndeı jeńildete turýǵa jetedi. Biraq tapshylyq qazannyń sońyna deıin, Pavlodardaǵy zaýyt iske qosylǵansha saqtalady», - dedi ol.
Apparat otyrysynda baǵa saıasaty da talqylandy. Qazirgi kezde óńirde AI-95 markaly 1 lıtr benzınniń baǵasy 155 teńgege deıin jetedi. Oblys ákimi Erlan Qoshanov qyzmetkerlerdiń aldyna janarmaıdyń budan ári qymbattamaýy úshin búkil sharalardy qarastyrý talabyn qoıdy.
